Полиция интернет-алаяқтар нысанына автокөлік иелері іліге бастағанын ескертті, – деп хабарлайды 7-su.kz ақпараттық порталы Polisia.kz сайтына сілтеме жасап.
Киберқылмыскерлер жол қозғалысы ережесін бұзғаны үшін жалған айыппұлдар жіберіп, азаматтардың жеке және қаржылық деректерін иемденуге тырысады.
– Қаскөйлер автокөлік иелеріне электрон пошта немесе мессенджерлер арқылы хаттар мен хабарламалар жібереді. Онда жүргізушінің жеке деректері, көлік нөмірі және «айыппұлды төлеуге арналған» сілтеме көрсетіледі. Алайда бұл – фишингтік шабуыл. Егер адам банк картасының деректерін енгізсе, алаяқтар оның есепшотына қол жеткізеді. Кей жағдайларда сілтемелер арқылы жеке деректерді ұрлайтын вирустар да таралады. Мұндай шабуылдар АҚШ пен Ресейде тіркелген, ал енді олардың Қазақстанда таралу қаупі бар, – деді Алматы ПД Киберқылмысқа қарсы күрес басқармасының бастығы Әнес Қалдыбаев.
Полицияның мәліметінше, ресми айыппұл туралы хабарламалар тек 1414 қысқа нөмірінен келеді және онда төлем жасауға арналған сілтемелер болмайды.
Айыппұлдарды тек ресми платформаларда – egov.kz, qamqor.gov.kz сайттарында немесе банктердің мобильді қосымшалары арқылы тексеруге кеңес берілді.
