Астанада, Алматыда және Қазақстанның 16 облысында 10 қыркүйекте дауылды ескерту жарияланды, – деп хабарлайды 7-su.kz ақпараттық порталы «Қазгидромет» РМК-ның баспасөз қызметіне сілтеме жасап.
Таңертең және күндіз Ұлытау облысының солтүстігінде, шығысында, орталығында найзағай ойнап, солтүстік аймақтарда бұршақ жауады. Жел батыстан, солтүстік-батыстан соғып, екпіні 15-20 м/с жетпек. Шығыста жоғары өрт қаупі, ал оңтүстікте төтенше өрт қаупі сақталады. Жезқазғанда күндіз найзағай ойнап, желдің күші 15 м/с-қа дейін барады.
Жетісу облысының таулы аудандарында күн райы бұзылып, найзағай ойнайды.
Қарағанды облысының батысы мен солтүстігінде аздап нөсер жаңбыр жауып, найзағай ойнайды, бұршақ жауып, дауыл соғады. Шығысында тұман түспек. Солтүстігінде оңтүстіктен соққан желдің екпіні 15-20 м/с дейін жетеді. Өрт қаупі аймақтың солтүстігінде жоғары, оңтүстігінде төтенше деңгейде сақталады. Қарағандыда күндіз найзағай ойнайды.
Қызылорда облысының солтүстігі мен орталығында күндіз шаңды дауыл тұрып, жел 15-20 м/с жылдамдықпен соғады. Өрт қаупі төтенше деңгейде. Қызылордада шаңды дауыл тұрады, жел екпіні 16 м/с-қа дейін күшейеді.
Шығыс Қазақстан облысының солтүстігі мен шығысында түнде және таңертең тұман түспек.
Жамбыл облысының таулы аудандарында найзағай жарқылдайды. Түнде таулы өңірлерде, күндіз облыстың оңтүстік-батысы мен солтүстік-шығысында жел 15-20 м/с дейін күшейеді. Өрт қаупі төтенше деңгейде. Таразда да жағдай осылай сақталады.
Алматы облысының таулы аудандарында түнде аздап нөсер жауады. Күндіз оңтүстігінде найзағай ойнап, таулы және тау бөктеріндегі аймақтарда жел 15-20 м/с-қа жетеді. Алматыда түнде және таңертең найзағай ойнап, жел екпіні 15 м/с болады.
Қостанай облысының солтүстігі мен шығысында нөсер жаңбыр жауып, күндіз бұршақ түсіп, дауыл соғады. Түнде және таңертең батысы мен оңтүстігінде тұман болады. Желдің екпіні 15-20 м/с дейін күшейеді. Облыстың оңтүстік-батысында төтенше өрт қаупі, шығысында жоғары деңгейде сақталады. Қостанайда кей уақытта нөсер жауып, найзағай ойнайды.
Астанада 10 қыркүйекте күндіз найзағай ойнап, бұршақ жауып, дауыл тұрады. Таңертең және күндіз оңтүстік-батыстан жел соғып, күші 15-20 м/с жетеді.
Маңғыстау облысының батысы, солтүстік-шығысы және орталығында күндіз найзағай ойнап, желдің екпіні 15-20 м/с-қа жетпек. Өрт қаупі төтенше деңгейде. Ақтауда да өрт қаупі сақталады.
Ақтөбе облысының солтүстік-шығысында күндіз солтүстіктен жел соғып, жылдамдығы 15-18 м/с болады. Батысы мен орталығында өрт қаупі жоғары, шығысында төтенше деңгейде.
Атырау облысының басым бөлігінде төтенше, батысында жоғары өрт қаупі сақталады. Атырауда да осындай жағдай жалғасады.
Батыс Қазақстан облысының солтүстігі мен шығысында түнде және таңертең тұман болады. Күндіз батысы мен оңтүстігінде жел 15-20 м/с дейін күшейеді. Өрт қаупі облыстың батысында төтенше, ал оңтүстігі мен шығысында жоғары деңгейде. Оралда түнде және таңертең тұман түседі.
Түркістан облысының солтүстігінде күндіз шаңды дауыл тұрып, таулы аудандарында желдің күші 15-20 м/с-қа дейін жетеді. Өрт қаупі төтенше деңгейде. Шымкент пен Түркістанда да осындай жағдай сақталады.
Ақмола облысының солтүстігі, оңтүстігі және шығысында нөсер жауып, бұршақ түсіп, дауыл соғады. Түнде және таңертең батысы мен солтүстігінде тұман болады. Желдің екпіні 15-20 м/с дейін барады. Облыстың кей бөліктерінде өрт қаупі жоғары. Көкшетауда да найзағай ойнап, күндіз бұршақ жауады, дауыл тұрып, тұман түседі.
Павлодар облысының батысында түнде, ал күндіз солтүстігі мен оңтүстігінде найзағай ойнайды. Батысында желдің жылдамдығы 15-20 м/с-қа жетеді.
Солтүстік Қазақстан облысының солтүстігі мен шығысында нөсер жауып, күндіз бұршақ жауады, дауыл соғады. Түнде және таңертең батысы мен солтүстігінде тұман түспек. Күндіз желдің жылдамдығы 15-20 м/с. Петропавлда да найзағай ойнап, бұршақ түсіп, дауыл тұрады.
