Республика күнінде Жетісу облысында жастардың шығармашылық қабілетін дамытуға және олардың тапқырлық пен көшбасшылық қасиеттерін қолдауға бағытталған Жайдарманнан әкім кубогі ұйымдастырылды.
Байқауға облыстың әр өңірінен келген 11 команда қатысып, әзіл мен тапқырлықта, сахна мәдениеті мен актерлік шеберлікте өзара бақ сынады. Командалар қоғамдағы өзекті мәселелерді әзіл арқылы жеткізіп, көрерменнің көңілін көтерумен қатар, ой саларлық мазмұн ұсынды.
Жайдарман – жастар арасында кең тараған қозғалыстардың бірі. Ол сөйлеу мәдениетін жетілдіріп, шығармашылық әлеуетті дамытуға мүмкіндік береді.
Сайыс нәтижесінде бірінші орынды «SU» құрамасы, екінші орынды «Энерго» командасы, үшінші орынды «Қыздар-Ай» командасы иеленді. Ал көрермен көзайымы атанған Тұмар командасының ойыншысы Бекзат «Ең үздік ойыншы» аталымы бойынша арнайы ақшалай сыйлыққа ие болды.
Жетісу облысы әкімінің кубогі – жастардың мәдени және шығармашылық ортасын дамытуға бағытталған маңызды жоба. Бұл шара жас таланттардың әлеуетін ашып, олардың сахнадағы шеберлігін шыңдауға зор мүмкіндік берді.
Кешті көпшілікке танымал «Шапалақ» командасының капитаны Серікбай Орынбасар жүргізді.
Қазылар алқасының құрамына Panasonic Electric Works компаниясының ТМД елдері бойынша сату бөлімінің басшысы және Қазақстандағы өкілдік кеңсесінің директоры Думан Туребаев, продюсер әрі актер Ерлан Қасымжанұлы, ардагер жайдарманшы Әділбек Әбіл, Жетісу облысының Қоғамдық даму басқармасы басшысының орынбасары Ілияс Түстікбаев, сондай-ақ «Көшбасшы – 2025» жастар сыйлығының иегері, кәсіпкер Жазила Темірбекова енді.
«Жетісу-Ақпарат»
