Алакөл ауданы экологиялық, танымдық, спорттық, емдеу-сауықтыру және аңшылық туризмді дамытуға қолайлы өңір. Суының шипалық қасиеті мол Алакөлге өткен жылы 1,5 миллион адам келді. Жыл бойы 9 млрд. 529 млн. тенгенің қызметі көрсетілді. Биыл жаңадан 8 туристік нысан іске қосылмақ. Оған 1398,5 млн. теңге инвестиция құйылған.
Әрине, жаз келсе көп жұрттың суы шипалы айдынды Алакөлге қарай алып ұшатыны белгілі. Енді бірер айдың көлемінде көл жағасында қызу тіршілік, қарбалас шақ басталады. Алакөлге көбіне көршілес Ресейден адамдар келуші еді, соңғы жылдары жерлестеріміз де шипалы суға ағылатын болды. Алыс шетелден келетіндердің қатары молая түскен. Олар жан рахатының Қырымда, Антальяда емес, Алакөлде екенін шын сезіне бастады. Ендеше, «Биылғы шомылу маусымына алакөлдіктер дайын ба?» деген сұрақтың туындайтыны анық. Осындай сұрақпен Ақши ауылындағы «Алакөл турбаза» демалыс орнының басшысы Еркін Ермырзаевпен жолығып, дайындық жұмыстарын білдік.
– Өткен жыл біздің мекеме үшін табысты болды. Келушілердің қатары көбейген сайын қызмет көрсетуге деген сұраныс та арта түсті. Әрине, біздің мақсат – туристерге жайлы жағдай жасау. Бірақ әр елден, тіпті, еліміздегі әр аймақтан келгендердің талғам-таразысы әртүрлі болады. Сондықтан қызмет көрсету аясында түрлі жаңа идеялар туындап жатады. Заман талабына сай біз де әрбір ұсынысты ескеріп, қызмет көрсету сапасын жақсартудың жолын қарастырудамыз. Шомылу маусымына да аз уақыт қалды. Сондықтан дайындық жұмысын қазірден бастап кеттік, – дейді кәсіпкер.
«Алакөл турбаза» демалыс орны Ақши ауылындағы тарихы терең демалыс орны. Өткен жылы күніне 500 адамнан қабылдап отырған нысан биыл күнделікті адам санын 600-ден асыруды жоспарлап отыр. Айта кетерлігі, былтыр аталған демалыс аймағының басшысы Еркін Ермырзаев жыл соңында аудан әкімі Алмас Абдиновтың қолынан «Туризм саласының үздігі» атты төсбелгі алып, кеудесіне қадады. Осы жетістігін төмендетіп алмау үшін ерте бастан демалыс орнын ретке келтіріп, ауладағы ағаштарды ақтап, күл-қоқысты тазалап, шөп-шалаңды өртеп, бүлінген жолдарды жасап, есік-терезе, қақпаларды бояп, аулаға сан түрлі гүл отырғызып, келушілерге экологиялық таза көкөніс ұсыну үшін жылыжай жұмысын қолға алыпты.
Мұндай дайындық тек «Алакөл турбаза» демалыс орнында ғана емес, Ақши және Көктұма ауылында орналасқан демалыс нысандары мен туристерді қабылдайтын жеке тұрғын үйдің аулаларында да жүріп жатқанын көрдік. Демек, алакөлдіктер алдағы шомылу маусымына сақадай сай.
Қажет Андас
Ақши ауылы,
Алакөл ауданы
