Ел Президенті Халықаралық волонтерлер форумында еріктілер қоғамда айрықша рөл атқаратынын атап өтті. Бүгінде әр салада еңбек етіп жүрген азаматтар, әсіресе жастар, студенттер мен оқушылардың ерікті қызметке қатысуы арқылы белсенді өмірлік ұстаным дағдыларын қалыптастыруы қоғам тарапынан айрықша ықыласқа ие болары сөзсіз. Ерікті азаматтардың қатарында мемлекеттік қызметшілер де аз емес. Солардың қатарында ҚР Сауда және интеграция министрлігінің Жетісу облысы бойынша сауда және тұтынушылардың құқықтарын қорғау департаментінің бас маманы Ғазиз Аманжолұлы да бар.
Мемлекет басшысының бастамаларын жергілікті жерлерде тиісті деңгейде орындау үшін Қазақстан Республикасы Мемлекеттік қызмет істері агенттігінің Жетісу облысы бойынша департаментінің жанынан «Еріктілер кеңесі» консультативтік-кеңесші органы құрылып, мемлекеттік қызметшілер арасында еріктілер қозғалысын үйлестіруді, сондай-ақ мемлекеттік қызметшілердің ерікті бастамаларын және осы сала талаптарының үйлесімдігін қамтамасыз етуді жүзеге асырып келеді. Ғазиз Аманжолұлы өзінің негізгі қызметінен тыс уақытта қоршаған ортаны қорғау, мұқтаж азаматтарға көмектесу, сондай-ақ, қоғам өміріндегі өзге де мәселелерге белсенді араласып, түйткілді мәселелерді шешуге атсалысуда. Мәселен, экобелсенді ретінде ол елімізде экологиялық мәдениетті арттыруға, аумақтарды тазарту мен абаттандыруға, қоршаған ортаның ластану мәселелеріне назар аударуға және халықтың тазалық пен табиғатты сақтау үшін жауапкершілігін қалыптастыруға бағытталған «Таза Қазақстан» республикалық акциясын белсенді қолдайды. Әлеуметтік бастаманы іске асыру үшін экобелсенді шілде айында әлеуметтік желілер арқылы жетісулықтарға хабарлап, нәтижесінде бірқатар мекеме мен азаматтардың қолдауына ие болды. Сондай-ақ, 2021 жылдан бері өзінің ауласында қоқысты металл, пластик-шыны, макулатура, целлофан фракцияларына бөліп, қоқыс өңдеу мекемелеріне өткізуді әдетке айналдырған. Осы жұмыстан түскен қаржы «Харекет» және басқа да қайырымдылық қорларына аударылады. Ғазиз Аманжолұлының айтуынша, осы жылы қалдықтарды өткізуден түскен 100 мың теңгеден астам қаражат қайырымдылық қорларына жіберіліпті. Сонымен қатар, «Таза Қазақстан» республикалық акциясын қолдау мақсатында Ғазиз Аманжолұлы әлеуметтік бастама көтеріп, өз қаражаты есебінен Талдықорған қаласында тұратын аз қамтылған және көпбалалы отбасыларға қоқыс сұрыптауға арналған 100 қоқыс жәшігін табыстады.
Бұдан бөлек, ерікті 1985 жылдан бері еліміздің аумағында құжатсыз тұрып жатқан Өзбекстан Республикасының тумасы Д.Атажановтың мәселесін шешуге атсалысып, «Қазақстан Республикасының азаматтығы жоқ куәлігі» деген статуста паспортын алуға көмек көрсетті. Д. Атажанов 2014 жылдан бері Талдықорған қаласының «Өмірлік қиын жағдайда қалған адамдарға арналған әлеуметтік бейімдеу орталығында» қызмет алушы және ресми тұрғылықты жері жоқ деп тіркелген болатын. Ғазиз Аманжолұлының айтуы бойынша қазіргі уақытта қария Қазақстан Республикасының қорғауына алынды және алдағы уақытта оған зейнетақы төлемін тағайындау бойынша тиісті жұмыстар жүргізілуде.
Әріптесіміздің мемлекеттік қызметтегі және қоғамдық жұмыстардағы еңбегі еленіп, марапаттарға ие болуда. Осы уақытқа дейін Ғазиз Аманжолұлы Президенттің Алғыс хаты, «AMANAT» партиясы басшылығының Құрмет грамотасымен, сондай-ақ, республикалық ұйымдар, басқарма басшылары, орталықтар директорларының Алғыс хаттарымен марапатталды. Алматы облысы әкімінің «Көшбасшы» жастар сыйлығының «Жас саясаткер» номинациясы, Жетісу облысы әкімінің «Көшбасшы – 2024» жастар сыйлығының «Үздік волонтер» номинациясының иегері. Еліміздің облыстары мен республикалық маңызы бар қалаларында алғаш рет өткізілген өңірлік кадр резервінің іріктеу кезеңдерінен өтіп, Жетісу облысының өңірлік кадр резервіне алынған 20 жастың қатарынан көрінді.
Ғазиз Аманжолұлының кәсіби қызметпен қатар қоғамдық жұмыстардағы өзекті мәселелерге тікелей қатысуы бүгінгі жастарға үлгі. Жеке жауапкершілік пен өз еліне деген сүйіспеншілік азаматтарымызды жақсы жаққа бағыттаудың көрінісі деуге болады. Оның қоршаған ортаны қорғауға және қоғамдық бастамаларды дамытуға қосқан үлесі құрметке лайық.
Қобылан МАНАП,
Қазақстан Республикасы
Мемлекеттік қызмет істері агенттігінің
Жетісу облысы бойынша департаментінің басшысы
