Айта кету керек, іс-шараға Мәскеуден келген И.Сеченов атындағы Бірінші Мәскеу мемлекеттік медицина университетінің (РФ) факультеттік хирургия кафедрасының меңгерушісі профессор Алексей Лотов қатысты. Шеберлік сағатының басты нәтижесі – Жетісуда бұрын қолданылмаған жаңа емдеу әдістерін, атап айтқанда бауыр эхинококкозында пункциялық-дренаждық араласуларды енгізу болды.
Алғашқы күні профессор Лотов облыстық көпсалалы клиника директоры Мадияр Өмірбаевпен, профессор Дауренбек Арыбжановпен және мекеме мамандарымен бірге таңғы кеңес өткізді. Кейін науқастарды қабылдап, алдағы күндерге жоспарлы ота кестесін құрды. Осы күні профессор Лотов бауыры ісікпен зақымданған науқасқа іш қуысына дренаж қою процедурасын жасады.
– Біз профессор Лотовқа шақыруымызды қабыл алып, Жетісуға келгені үшін алғыс білдіреміз. Оның минималды инвазивті хирургия саласындағы тәжірибесі мен білімі – клиникамыздың ғана емес, бүкіл өңірдің денсаулық саласының дамуына ықпал етеді. Мұндай шеберлік сағаттарының ең басты құндылығы – мамандарымыз жаңа технологияларға қол жеткізіп қана қоймай, практикалық оқудан өтеді, – деді клиника директоры Мадияр Өмірбаев.
Шеберлік сағатының екінші күні ота және оқу-әдістемелік жұмыстарға толы болды. Тәжірибе алмасу сағатында жамбас кистасын алып тастау бойынша ашық ота жасалды. Облыстық ауруханада екі минималды инвазивті процедура орындалды: бауыр кистасын УДЗ бақылауымен қайта дренаждау және эхинококкэктомия (12 см-ден асатын кистаға).
Кейін профессор Лотов аймақ хирургтары мен онкологтарына лекциялар циклын оқып, механикалық сарғаю, асқынған панкреатит және бауырдың паразиттік ауруларын емдеудегі заманауи тәсілдерімен бөлісті.
Соңғы күні науқастарды аралап, клиникалық онкопатологияларды талқылауынан басталды. Бұдан кейін облыстық ауруханада бес жоғары технологиялық ота жасалды. Олардың ішінде: жатыр мойны обыры кезінде артерия ішіне рентгенхирургиялық араласулар, анатомозды реканализация, бауыр эхинококкозын санациялау және кисталарды дренаждау.
Шеберлік сағатының қорытындысы бойынша 20 науқас қаралды және кеңес алды, 9 ота жасалды, оның 8-і – минималды инвазивті технологиялар арқылы және 3 кеңейтілген консилиум өткізілді.
Облыста алғаш рет бауыр эхинококкозында пункциялық-дренаждық ота жүзеге асты.
– Шеберлік сағаты жай ғана оқу іс-шарасы емес, бүкіл өңірдің денсаулық сақтау жүйесі үшін нақты практикалық қадам болды. Біз алдағы уақытта да минималды инвазивті хирургияны дамытып, кадрларды оқытып, жаңа әдістерді енгізуді жалғастырамыз. Мұндай іс-шараның барлығы – науқастарымыздың саулығы үшін, – деп атап өтті М. Өмірбаев.
Айта кету керек, шеберлік сағаты денсаулық сақтау басқармасының қолдауымен ұйымдастырылды. Ол қазақстандық және шетелдік мамандардың ынтымақтастығының өңірлік медицинаны дамытуға бағытталған жарқын үлгісі.
Өз тілшіміз
