Елбасы Н. Назарбаевтың «Болашаққа бағдар: рухани жаңғыру» атты мақаласында: «Жаңа үлгідегі жаңғырудың басты шарты – өз мәдениетімізді, өзіндік ұлттық кодты сақтау», – деп атап көрсетті. Осы орайда әл-Фараби атындағы Қазақ ұлттық университетінің археология, этнология және музеология кафедрасы маңызды жұмыстар атқаруда.
Археология, этнология және музеология кафедрасы 1971 жылы сол кездегі университет ректоры Ө. Жолдасбековтың ұсынысы бойынша Қазақстанда ең алғаш тарих факультетінде ашылды. Бүгінде бұл кафедра республикада және оның сыртқы аумақтарында жоғары маманданған кадрлар дайындаудың негізгі орталығы саналады. Маманданған кафедраның ашылуына Қазақстандағы этноархеология ғылымының интенсивті дамуы әсер етті. Әсіресе ХХ ғ. екінші жартысында маманданған археологтар мен этногрофтар тарих саласы үшін өте қажет болды. Кафедраның құрылған күнінен бастап оны Қазақстандағы белгілі ғалымдар басқарды.
Кафедрада «Археология және этнология», «Музей ісі және ескерткіштерді қорғау» мамандықтары бойынша жоғары квалификациялы мамандар даярланады және бұл мәселе бүгінгі күннің басты талабы болып отыр. Мамандар бакалавр, магистратура, докторантура деңгейі және сырттай оқу бөлімі бойынша оқиды. Аталған мамандықтардың қарастыратын негізгі нысаны – халықтардың этногенезі мен этникалық тарихы, этностың шаруашылық-мәдени типі, әлем халықтарының этникалық және этномәдени процестері, қазіргі Қазақстандағы этникалық топтардың этнографиясы, Қазақстан территориясын мекендеген тайпалардың археологиялық ескерткіштері және музей ісінің бүгінгі күнгі жағдайы мен ескерткіштерді қорғау мәселелері.
Мамандықтың білім беру бағдарламасы халықаралық стандарттар және нарықтың сұранысындағы өзгерістерге сай үнемі модернизациялануда. Археология және этнология саласы бойынша студенттер кәсіби білімін бекіту мақсатында Жамбыл облысы Шу ауданында орналасқан «Ортағасырлық Ақтөбе» қалашығы-базасында үш жыл қатарынан оқу және өндірістік тағылымдамадан өтеді. Кафедра студенттері, магистранттары және докторанттары ғылыми зерттеулерге араласады. Олар Ресей, Италия, Голландия, Франция, Германия, Түркия, Жапония, Қытай және басқа елдердің мамандарымен бірге ғылыми-зерттеу жұмыстарын жүргізіп, бірлескен археологиялық экспедицияларға қатысады.
Қ. БАУДИЯРОВА,
Г. МЕЙІРМАНОВА,
әл-Фараби атындағы ҚазҰУ
археология, этнология және музеология кафедрасының аға оқытушылары, тарих
ғылымдарының кандидаттары
