Өткен жылдың қараша айынан бастап Бақбақты, Бірлік, Ақдала және Береке ауылдық округтері аумағындағы суармалы егістік алқаптарына су жеткізетін арналарды тазалау және егіс алқаптарындағы гидротехникалық имараттарды жаңалау жұмысы жүруде. Осы орайда мұндай ауқымды жұмыстың Ақдала алқабы игерілген жылдардан кейін алғаш рет жасалып жатқанын айта кеткен жөн.
Егіс алқаптарына күрделі жөндеу жасауға тапсырыс беруші ҚР Экология, геология және табиғи ресурстар министрлігінің Су ресурстары комитеті болып табылады. Екі жыл мерзімге жоспарланған ПУИД-2 бағдарламасы бойынша жалпы аумағы 7481 гектар жерді құрайтын ауқымды жұмысты жүйелі жүргізуді өз міндетіне алған «ТАМАС» ЖШС белгіленген жұмыс кестесіне сай биылдың қараша айында жұмысты аяқтайды деп жоспарлауда. ПУИД-2 бағдарламасы бойынша егіс алқаптарына жүргізіліп жатқан жұмысты көзбен көру мақсатында аудан әкімінің орынбасары Бауыржан Дәрібаев, аудандық ауылшаруашылығы бөлімінің басшысы Бүркіт Мұқановпен бірге Ақдала ауылдық округінің аумағында орналасқан «Өтес-Ақдала» ЖШС және Береке ауылдық округіне қарасты «Тамшыбұлақ» ЖШС егіс алқаптарына арнайы барып қайттық.
Сапар барысында аудан басшысының орынбасарына Су ресурстары комитетінің ПУИД-2 бағдарламасы бойынша жоба басшысы Бақытжан Қосаев, осы мекеменің техникалық кеңесшісі Ерлан Тәжіқұлов, «ТАМАС» ЖШС жер өлшеушісі Жақсылық Есмағанбетов атқарылып жатқан жұмыс ретін таныстырды. Әңгіме барысында жоба басшысы Бақытжан Қосаев жоспарланған кестеге сай 7481 гектар суармалы алқаптарға су тарататын 135 шақырым арна, 139 шақырым қашыртқы арна, сонымен қатар 240 шақырым алқапаралық арналар тазаланса, 6720 дана гидротехникалық имараттар ауыстырылып жатқанын айтты.
Ал, Ерлан Тәжіқұлов егіс алқаптарындағы арналарды қазу үшін 5 экскаватор, 1 бульдозер, сондай-ақ, жұмысқа қажетті басқа да техникалардың жұмылдырып жатқанын және 35 адамның тұрақты жұмыспен қамтамасыз етілгенін айта келе, бүгінге дейін жоспарланған жұмыс кестесіне сай 120 шақырым арна, 125 шақырым қашыртқы арна, 154 шақырым алқапаралық арналардың тазаланғанына баса тоқталды.
ПУИД-2 бағдарламасы бойынша атқарылып жатқан жұмыстардың егіс алқаптарына тигізер пайдасы орасан зор болмақ. Егіс алқаптарына тіршілік нәрін жеткізетін арналарға қазу жұмыстары тұрақты түрде жасалып тұрса, келешекте күрішті сумен бастыру ісінде қиындық тумайтыны анық. Ал қашыртқы арналарды тазаласа, жерасты суларының тез көтеріліп, егіс алқаптарының сорлануына жол берілмейді. Осындай өзекті де өткір мәселелер осы істердің нәтижесінде оң шешімін табатыны анық.
Б. ДӘУІТБАЕВ
Балқаш ауданы
