Арман қанатына мініп алысқа аттанар сәт туған сайын оқушылық кезеңге деген қимастық сезім билеп барады. Өне бойымызды шарпыған осынау сезім жетегінде ең алдымен ұлағат иелеріне, ұстаздарымызға, бізді өмірге алып келіп, адамдық жолды нұсқаған ата-аналарымызға алғыс айтқым келеді.
Мен, Амина Мәуленқызы, оқушылық кезеңді ең бақытты шақ деп білемін. Ұлағат иелерінің әріптен үйреткен білімін бойға сіңіріп, ата-ананың аялы алақанында болдық. Бүгін, міне, сыңғырлаған соңғы қоңыраудың үнін естіп тұрмыз. Жанымыз толқуда. Мұның өзі ауылда, туған үйде жатып тілекшіміз болатын ата-анамыздың қамқорлығын, әр дүниені зерделеп, салмақтап түсіндіретін мұғалімнің мейірімін сағынтатыны анық. Осы орайда барша жетісулық түлектерге сәт сапар тілеймін!
Сәбилік пен оқушылық кезеңді ғана бастан кешкенімізбен алдағы болашақ өмірдің қаншалықты қызық, қиын боларын ұстаздар мен ата-аналардың әсерлі әңгімесінен-ақ салмақтай алдық. Мен республикалық ғылыми жобаларда, түрлі байқауда, облыстық Ілияс, Абай оқуларында жеңімпаздар қатарынан көріндім. Жетекшілерім болған қазақ тілі мен әдебиеті пәнінің мұғалімдері Айша Абдрахманқызы мен Әлия Қыдырханқызына ерекше алғыс айтамын.
Қазақ елінің болашағы болар біздің алдымызда үлкен жауапкершілік тұр. Соны сеніммен алып жүру үшін алтын ұя мектепте тәрбиеленіп, білім жинадық. Ендеше, облысымызда 11, 9-сынып бітіріп жатқан 18 мыңнан астам оқушыға өмірдің бар жақсылығын, «Алтын белгіге» үміткер мен секілді құрбы-құрдастарыма, түлектерге шалқар шабыт тілеймін.
Мектепте алған білімімізді Ұлттық бірыңғай тестілеуде тиісінше ақтап шықсақ екен деген жалпы тілегімді тарихы 106 жасқа жеткен «Jetisý» газеті арқылы осылайша айшықтап отырмын.
Әмина САМАТОВА,
Талдықорған қаласындағы №20 мамандандырылған лицейінің 11-сынып оқушысы,
«Алтын белгі» үміткері
