Аудандағы асыл тұқымды ірі қара малының етін экспорттау және өңдеуге бағытталған «Қайыңды» ЖШС өнімін шетелдерге эскпорттайды. Соңғы технологиялар мен осы саланың озық тәжірибелері қолданылып отырған цех аз уақыттың ішінде едәуір көрсеткіштерге қол жеткізді.
Асыл тұқымды «Герефорд», «Ангус» сиырлары Мельбурн-Сингапур-Алматы бағытында әуе жолдары арқылы жүк ұшақтарымен шаруашылыққа жеткізілген. Бүгінде саны 6800-ге өсті. Бұл асыл тұқымды малды аудандағы ауылшаруашылық құрылымдарына сатуға ғана емес, өндіріс орнында 5000 бас ірі қараны бордақылауға да мүмкіндік береді. Сондай-ақ, соңғы технологияларды пайдалана отырып етті терең өңдеу өз кезегінде әлемдік нарыққа шығуға үлкен серпіліс беруде.
Өндірісте қолданылатын қалдықсыз технология күніне 60 бас ірі қараның етін өңдеуге мүмкіндік береді. Әрқайсысы 120 тонналық екі қуатты мұздатқыш та бар. Әзірге жұмыс басталғалы бері цех отандық нарыққа 500 тонна ет шығарған. Ал шегара асыруға әлі асығыстық жоқ. Бұл жөнінде:
– Бүгінде экспорттауға рұқсат алу үшін құжаттарды реттеп жатырмыз. Барлығын заң аясында үйлестіру үшін біраз уақыт керек. Қазіргі таңда өнімді тек Алматы облысы аумағына ғана емес, бүкіл Қазақстанның аумағына таратуды көздеп отырмыз. Бүгіннің өзінде бес мемлекеттен тапсырыс түсіп отырғаны қуантады, – дейді цех басшысы Александр Ковалев.
Өндіріс орнының шұжықтың 12 түрінен күніне 6 тонна өнім өңдеуге қуаттылығы жетеді. Өнімнің сынамалы түрлері шығарылып, толық тексерістен өткен. Жартылай ысталған «сервелат», «краковтық», «карпаттық», «аңшылық» шұжықтары, «ветчина» және пісірілген шұжықтың бірнеше түрі өндірілуде.
Айта кетерлігі, нарыққа сапалы әрі сенімді өнімді жарнамалау, өзіндік брендті қалыптастыру мақсатындағы маркетинг ісіне мәскеулік мамандар да тартылған.
Мұнда технологияның Түркия, Қытай және АҚШ мемлекеттерінен әкелінген және Еуропаның ет өңдеу цехтарында тәжірибеден өткен түрлері қолданылуда. Алдағы уақытта тұшпара мен котлет дайындауға арналған украиналық аппараттарға тапсырыс беріп қойған екен. Жұмыс қуаты артқан сайын көршілес Сарқан және Ақсу аудандарынан, қажет болған жағдайда Шығыс Қазақстан облысындағы шаруа қожалықтары мен жеке шаруа қожалықтарынан да ірі қара малы сатып алынады.
Алмат ЕСЕНБЕКОВ,
Алакөл ауданы
