Мемлекет басшысы Қасым-Жомарт Тоқаев Digital Bridge 2025 халықаралық форумы аясында Біріккен Араб Әмірліктерінің Жасанды интеллект, цифрлық экономика және қашықтан жұмыс істеу мәселелері жөніндегі мемлекеттік министрі Омар Әл-Оламамен және Абу Даби Денсаулық сақтау департаментінің төрағасы, G42 International компаниясының бас директоры Мансур Ибрагим әл-Мансуримен кездесті.
Бұл туралы 7-su.kz ақпараттық порталы хабарлайды.
Кездесуде жасанды интеллект саласындағы екіжақты ынтымақтастықты кеңейту мәселелері талқыланды. Президент БАӘ-нің жасанды интеллект технологияларын дамытудағы тәжірибесін жоғары бағалап, бірлескен күш-жігердің арқасында ІТ секторында маңызды жобалар іске асырылғанын атап өтті.
Тоқаев елімізде жасанды интеллектке маманданған жаңа университет ашу жоспарын таныстырды. Бұл ретте ол әлемдегі алғашқы ІТ университетін құрған Әмірліктер тәжірибесін зерделеудің маңызын атап өтті.
Әңгімелесу барысында Smart City бірлескен жобасына ерекше назар аударылды. Мемлекет басшысының айтуынша, аталған бастама екіжақты серіктестікті дамытуда маңызды кезең болмақ.
