Қасым-Жомарт Тоқаев әл-Фараби атындағы ғылым мен техника және Ахмет Байтұрсынұлы атындағы гуманитарлық ғылымдар саласындағы 2025 жылғы мемлекеттік сыйлықтарды беру туралы Жарлыққа қол қойды, деп хабарлайды Ақорда.
Мемлекеттік сыйлықтар ғылым мен техника, сондай-ақ гуманитарлық бағыттарда еңбек еткен үздік ғалымдарға табысталды.
Әл-Фараби атындағы ғылым мен техника саласындағы мемлекеттік сыйлық келесі жұмыстар үшін берілді:
1. «Қазақстан Республикасының гидрогеологиялық карталар атласы» тақырыбы бойынша:
«У.М. Ахмедсафин атындағы Гидрогеология және геоэкология институты» ЖШС директоры, геология-минералогия ғылымдарының докторы, профессор Мәліс Әбсәметовке;
«АлматыГидроГеология» ЖШС бас директоры Рахматулла Аязбаевқа;
Қ.И. Сәтбаев атындағы Қазақ ұлттық техникалық зерттеу университетінің ғылым және корпоративтік даму жөніндегі проректоры, профессор Ержан Көлдеевке;
«Гидрогеология және геоэкология институты» ЖШС директорының ғылым жөніндегі орынбасары Ермек Мұртазинге;
Аталған институттың өңірлік зертханасының бас ғылыми қызметкері Владимир Смолярға.
2. «Кондициялық емес түсті металлургия шикізатынан жоғары сапалы селен алудың экологиялық қауіпсіз вакуум-термиялық технологиясын дайындау және оның өнеркәсіптік өндірісін ұйымдастыру» тақырыбы бойынша:
«Металлургия және кен байыту институты» АҚ бас директоры, профессор Бақдәулет Кенжәлиевке;
Осы институттың бас ғылыми қызметкері, профессор Валерий Володинге;
«Қазақмыс корпорациясы» ЖШС департамент директоры Ержан Оспановқа;
«Металлургия және кен байыту институты» АҚ бас директорының орынбасары, профессор Сергей Требуховқа;
«Қазақмыс корпорациясы» ЖШС басқарма бастығы Александр Шахаловқа.
Ахмет Байтұрсынұлы атындағы гуманитарлық ғылымдар саласындағы мемлекеттік сыйлық келесі еңбектер үшін табысталды:
1. «Қазақстан археологиясы. Деректер мен зерттеулер» сериялық басылымы
Ә.Х. Марғұлан атындағы Археология институтының бас ғылыми қызметкері, тарих ғылымдарының докторы, профессор Зайнолла Самашевке.
2. «Қазақстанның үзіліссіз мемлекеттілігі тарих толқынында. XV–XIX ғасырлардағы еуропалық және америкалық карталарындағы Қазақ Мемлекеті» еңбегі Л.Н. Гумилев атындағы Еуразия ұлттық университеті Заманауи зерттеулер институтының директоры, филология ғылымдарының кандидаты, PhD, профессор Мұхит-Ардагер Сыдықназаровқа.
