Мемлекет басшысы Қасым-Жомарт Тоқаев Қаржылық мониторинг агенттігінің төрағасы Жанат Элимановты қабылдады, – деп хабарлайды 7-su.kz ақпараттық порталы.
Президентке агенттік қызметінің негізгі нәтижелері мен алдағы міндеттері ұсынылды. Ақшаны жылыстатуға қарсы іс-қимыл шаралары жөнінде баяндалды. Ведомство жалған компаниялар арқылы 24 млрд теңгеден аса қаржыны қолма-қол ақшаға айналдыру деректерін анықтап, есірткі сатудан және алаяқтықтан түскен табыстарды жылыстатқан 20 заңсыз криптобиржаның жұмысын тоқтатты. ТМД аумағындағы ең ірі криптосервис жойылып, 9,7 млн долларға тең виртуалды активтер бұғатталды.
Қаржылық мониторинг агенттігі 720 қылмыстық істі тергеп, 15 ұйымдасқан қылмыстық топты, соның ішінде 3 трансұлттық топты әшкереледі. Заңсыз мұнай өнімдерін шығару әрекетімен байланысты 17,1 млрд теңге көлеміндегі дерек, заңсыз темекі және алкоголь өнімдерін өндіретін 18 жасырын цех анықталды. Көлеңкелі айналымнан 12 млрд теңгенің вейптері алынды. Сонымен қатар, жалпы құны 164 млрд теңге болатын 63 инфрақұрылымдық жобаға бөлінген қаржының мақсатсыз жұмсалғаны, ауыл шаруашылығында 11 млрд теңгенің субсидиялары тиімсіз игерілгені белгілі болды. Бірыңғай жинақтаушы зейнетақы қорынан жалған стоматологиялық қызмет көрсету арқылы 200 млрд теңгені заңсыз шығару фактілері тіркелді.
Жанат Элиманов азаматтардың қаржылық мүдделерін қорғау шаралары туралы да баяндады. Заңсыз микронесие беру деректері бойынша 23 іс қозғалып, шығыны 71 млрд теңгені құрады. 300 мыңнан аса қарыз алушының берешегін қайтару және есептен шығару жұмыстары жүргізілуде. 112 мыңнан астам азаматты тартқан 45 қаржы пирамидасы жойылып, алаяқтық жобалар мен құмар ойындарға қатысты 31,5 мың сайт пен сілтеме бұғатталды.
Кездесу соңында Қасым-Жомарт Тоқаев ведомство жұмысының негізгі бағыттары бойынша бірқатар тапсырма берді.
