Күнтізбедегі 19 қазан – ерлік пен адамдықтың символына айналған ерекше күн. Бұл күні елімізде құтқарушылардың кәсіби мерекесі – Батырлар күні аталып өтеді. Табиғи апаттар мен төтенше жағдайларда алғашқы болып көмекке келіп, өз өмірін қатерге тігіп, өзгелердің өмірін сақтап қалатын жандардың еңбегі шын мәнінде ерлікке пара-пар.
Президент Қасым-Жомарт Тоқаев атап өткендей: «Халқымыздың амандығын және қауіпсіздігін сақтау – басты міндет әрі қастерлі парыз. Бұл – ең алдымен, құтқарушы мамандарға жүктелетін зор сенім мен жауапкершілік». Осы сенім мен парызды адал атқарып жүрген ер жүрек азаматтардың еңбегі биыл ерекше атап өтілді.
1995 жылы бекітілген мерекенің 30 жылдық мерейтойы биыл Жетісу өңірінде кең көлемде тойланды. Ілияс Жансүгіров атындағы Мәдениет үйінде «Отыз жыл қауіпсіздік күзетінде» атты салтанатты жиын өтіп, онда облыс әкімінің бірінші орынбасары Әлібек Жақанбаев құтқарушыларды мерекемен құттықтап, азаматтық борышын абыроймен атқарып жүрген мамандарға алғысын білдірді.
– Құтқарушы мамандығы – үлкен жүректілік пен қайсарлықты талап етеді. Апат алдын ала ескертпейді, сондықтан мұндай сәтте алғашқы көмек көрсететін – сіздер. Сіздің ерлігіңіз, кәсіби шеберлігіңіз және жанқиярлығыңыз халықтың сенімін нығайтады. Әрбір құтқарушы құрметке әбден лайық, – деді Әлібек Әскербекұлы.
Кеш барысында Төтенше жағдайлар департаментінің тарихы мен қызметкерлердің еңбегін танытатын бейнеролик көрсетілді. Ал департамент басшысының міндетін уақытша атқарушы Адамбек Оразалинов сөз алып, облыс басшылығына көрсеткен қолдауы үшін алғыс білдірді. Сондай-ақ ол еліміз бойынша өтіп жатқан «Қазақстан ТЖМ-нің 30 жылдығына арналған 30 игі іс» атты акция жөнінде айтып өтті. Мерекеге орай бірқатар қызметкерлер «ҚР ТЖМ 30 жылдығы» мерейтойлық медалімен марапатталды.
Саланың ардагерлері де назардан тыс қалмады. Төтенше жағдайлар департаменті Ардагерлер кеңесінің төрағасы Нұргелді Қойшыбаев сахна төріне шығып, жас мамандарға ізгі тілегін арнап, өз тәжірибесімен бөлісті.
Салтанатты жиын әсерлі концерттік бағдарламаға ұласып, сахнада құтқарушыларға арналған әндер шырқалды. Бұл кеш – ерлік пен адамдықтың, батырлық пен отансүйгіштіктің мерекесіне айналды.
Жетісу жері осылайша ел амандығы мен қауіпсіздігі жолында аянбай тер төгіп жүрген құтқарушыларға құрмет көрсетіп, олардың еңбегін ел есінде қалдырды.
«Жетісу-Ақпарат»
