Президент тапсырмасы бойынша Үкімет макроэкономикалық тұрақтылықты қамтамасыз ету және экономикалық реформалардың теріс салдарын барынша азайту мақсатында нақты шаралар қабылдап жатыр. Осыған орай Премьер-министр Үкімет мүшелері, мемлекеттік органдар мен ұйымдар басшыларының қатысуымен кеңес өткізіп, Мемлекет басшысының тапсырмаларын жүзеге асыру мәселелерін талқылады.
Жиын қорытындысы бойынша келесідей шешімдер қабылданды:
1. Жанар-жағармай бағасына мораторий енгізілді
2025 жылғы 16 қазаннан бастап АИ-92 маркалы бензин мен дизель отыны бағасын көтеруге мораторийжарияланды.
Энергетика министрлігіне Бәсекелестікті қорғау және дамыту агенттігімен және өңір әкімдіктерімен бірлесіп, ішкі нарықты ЖЖМ-мен үздіксіз қамтамасыз ету бойынша бақылау жүргізу тапсырылды.
2. Коммуналдық тарифтерді өсіруге тыйым салынды
Барлық тұтынушылар тобы үшін коммуналдық қызмет тарифтерін 2026 жылдың І тоқсанының соңына дейінкөтеруге тыйым салынды.
Бұл шешім табиғи монополиялар субъектілерінің операциялық шығыстарын оңтайландыру арқылы жүзеге асырылады.
Сонымен қатар, әлеуметтік осал топтарға тұрғын үй көмегі тетігі қолданылады.
Әлеуметтік маңызы бар азық-түлік бағасын тұрақтандыру үшін ауыл шаруашылығы өндірушілерін қаржыландыру екі есе ұлғайтылып, делдалдық схемаларды болдырмау бағытында өңірлік комиссиялардың жұмысы күшейтіледі.
3. ШОБ-қа арналған салықтық жеңілдіктер
Жаңа Салық кодексінің шағын және орта бизнеске теріс әсерін азайту мақсатында оңайлатылған декларация негізіндегі салық режиміне қойылған шектеулердің бір бөлігі алып тасталады.
Тыйым салынған тізімде бұрынғыдай тек 44 қызмет түрі қалады.
2026 жылғы 1 қаңтардан бастап микро және шағын бизнеске қатысты:
-
салықтық тексерулер мен камералдық бақылау алынып тасталады;
-
сот арқылы тіркеуді жарамсыз деп тану тәжірибесі тоқтатылады;
-
негізгі қарыз өтелген жағдайда өсімпұлдар мен айыппұлдар 2026 жылдың 1 сәуіріне дейін жойылады.
ҚҚС бойынша әкімшілік жауапкершілік те жеңілдетіліп, салық төлеушілер үшін оңайлатылған есептен шығару науқаны өткізіледі.
4. Ипотекалық бағдарламаларды кеңейту
Базалық мөлшерлеменің көтерілуіне байланысты ипотекалық несиелерді қолдау мақсатында тұрғын үй-құрылыс жинақ жүйесін қолдау шаралары қабылданды.
Арзандатылған ипотекалық несие көлемі екі есе ұлғайып, жалпы сомасы 500 млрд теңгеге дейін өседі.
Бұл бастама «Наурыз» және «Наурыз-Жұмыскер» бағдарламалары арқылы іске асырылады.
Сонымен қатар, «Әскери баспана» бағдарламасы қайта жанданып, жыл сайын кемінде 7 мың әскери қызметші отбасы жаңа немесе қайталама нарықтан баспана алу мүмкіндігіне ие болады.
Құрылыс компанияларымен офтейк-келісімшарттар жасалып, баға үш жылға тұрақтандырылады.
Осылайша, қабылданған шаралар экономикалық тұрақтылықты нығайтуға, инфляцияны тежеуге және азаматтардың әлеуметтік әл-ауқатын қорғауға бағытталған.
