Үшарал қаласында күрделі жөндеуден өткен «Арай» балабақшасының салтанатты ашылу рәсімі өтті. Жоба биылғы бюджеттік жоспар аясында жүзеге асырылып, құрылыс жұмыстарын «Нұр-Шапағат» құрылыс компаниясы сапалы орындады.
Жаңаша кейіпке енген балабақша бүгін заман талабына сай жабдықталып, балалардың жайлы әрі қауіпсіз жағдайда тәрбиеленуіне мүмкіндік беріп отыр. Салтанатты іс-шараға аудан басшылығы, ұстаздар, ата-аналар мен құрметті қонақтар қатысты.
Іс-шара барысында Алакөл ауданы әкімінің орынбасары Маулен Төлеужанов, ауданның құрметті азаматы, ұлағатты ұстаз Қысталасова Қоңыржай Жағыпбарқызы, сондай-ақ ардагер ұстаздар мен қоғам белсенділері құттықтау сөз сөйлеп, ұжымға сәттілік тіледі.
«Әр бала – елдің болашағы. Бұл балабақшаның қайта ашылуы – жас ұрпақтың тәрбиесіне, олардың жарқын келешегіне бағытталған маңызды қадам. Ауданда осындай әлеуметтік нысандардың жаңарып, халық игілігіне қызмет етуі – қуанышты жағдай», – деді аудан әкімінің орынбасары Маулен Төлеужанов.
Салтанатты рәсімде лента қиылып, шашу шашылды. Қонақтар жаңарған ғимаратты аралап, балабақша ішіндегі заманауи топ бөлмелерін және ойын алаңдарын тамашалады.
Жаңартылған «Арай» балабақшасы енді бүлдіршіндердің тәрбиесі мен дамуына барынша қолайлы орта ұсынып, Үшарал қаласының әлеуметтік инфрақұрылымының жаңаруына зор үлес қоспақ.
