Облыстық ішкі істер департаментінде көші-қон полициясы басқармасы бастығының орынбасары Қанат Еселбаев және жергілікті полиция қызметі бастығының орынбасары Шыңғыс Сабуровтың қатысуымен брифинг өтті.
Баспасөз отырысы азаматтарды тұрақты және уақытша тіркеуге қатысты заңға енгізілген өзгерістерге арналды. Елбасы Нұрсұлтан Назарбаев «Қазақстан Республикасының экстремизм және терроризмге қарсы тұру мәселелері туралы кейбір заңнамалық актілеріне өзгерістер мен толықтырулар енгізу туралы» заңына қол қойған болатын. Заң жобасын қабылдаудағы мақсат – терроризм және экстремизм, қару-жарақ айналымы мен миграциялық реттеу саласы бойынша іс жүзіндегі заңнаманы жетілдіру. Сондықтан жұмыс бабымен немесе қандай да бір себеппен тұрғылықты мекенжайын ауыстырған әрбір азамат уақытша тіркеуге тұруға міндетті. Ол үшін алдымен халыққа қызмет көрсету орталығына жүгініп, бар болғаны 10-20 минут уақыт жұмсауға болады. Тіркелу үшін мына құжаттар керек: тұрғын үй иесінің келісімі, оның жеке куәлігі, тіркелушінің жеке куәлігі және АЕК-тің 10 пайызы (226,9 теңге) көлеміндегі мемлекеттік салымның төленгені жайлы түбіртек. Тіркелуші азамат та, баспана иесі де тіркелуге келуі тиіс, себебі құжаттың чипіне өзгерістер жазылады. Өзі келе алмаған жағдайда нотариус қол қойған келісімшарт болуы тиіс. Сондай-ақ, электронды цифрлық қолтаңба болған жағдайда қазақстандық өзін «Электронды үкімет» арқылы тіркей алады, содан кейін ол тұрғылықты тіркеудің қажет емес екенін жазуы тиіс. Жалға берушілер мен уақытша тұрғындар тіркелмесе, айыппұл төлеуге мәжбүр. Жеке тұлғалар – 10 АЕК (22,690 теңге), шағын кәсіп иелері – 15 АЕК (34 мың теңге), ал ірі кәсіп субъектілері – 50 АЕК (113,5 мың теңге) төлейді.
– Айыппұл салу 1 ақпаннан басталады. Сондықтан, тәртіп сақшылары үй-үйді аралап, тексеру жұмыстарын жүргізіп, ескерту жасайды. Тұрғындар 1 ақпанға дейін тіркелуі тиіс. Тіркелу мерзімі 1 айдан 1 жылға дейін. Заң бойынша әрбір адамға кем дегенде 15 шаршы метр қажет. Сонда орташа екі бөлмелі пәтердің ауданы 60 шаршы метр болса, онда тек 4 адам тұра алады. Мерзімі өткен тұрғын автоматты түрде тіркеуден алынып, қоныс аударған жеріне тағы да тіркелуі тиіс, – деді Қанат Мустафайұлы.
Мәулен Әнербай
