«Мектепке жол» акциясы Абай атындағы Қазақ ұлттық педагогикалық университетінде де жалғасын тапты.
Университет Алматы қаласындағы № 17 мектеп-интернаттың оннан аса оқушысына қолдау көрсетті. Балаларға мектеп формалары мен қалам-дәптерлерін тапсырған ректор Такир Балықбаев бұл акцияға қатысып отырған оқушыларға ізгі тілегін жеткізіп, әлемге белгілі атақты университеттерде білім алуларына, тәуелсіз Қазақстанның көрнекті азаматтары болып қалыптасуларына тілектестігін білдірді.
– Мемлекет басшысы Қасым-Жомарт Тоқаевтың тапсырмасы бойынша бұл акция жаңа оқу жылы алдында ғана өткізіліп қоймай, жыл бойы жалғасын табатын болады, – деді ректор Т. Балықбаев. – Сондықтан, біздің университетіміз де осынау қайрымдылық іс-шарасын үнемі жалғастыра береді. Біз бұдан былай да № 17 мектеп-интернатпен тікелей байланыста болып, тұрмысы төмен отбасыларының балаларына жәрдемдесіп отырамыз.
№ 17 мектеп-интернат директорының тәрбие ісі жөніндегі орынбасары Түгел Төлегенқызы балаларға қамқорлығын көрсетіп жатқан мектеп ұжымы мен ата-аналар атынан Абай атындағы Қазақ ұлттық педагогикалық университетінің ректоры Т. Балықбаевқа және осы істі ұйымдастыруға тікелей атсалысқан кәсіподақ ұйымының төрағасы Мұхтар Ибраимовқа алғыс айтты. Өз кезегінде ата-аналар атынан сөз алған Көктем Шарипова да университет басшылығына жүрекжарды алғысын жеткізді.
Іс-шара соңы университет студенттерінің концертіне ұласты.
Абай атындағы ҚазҰПУ-дың
қоғаммен байланыс қызметі
