Қазіргі таңда оқу бағдарламасына білім технологияларын енгізу басты талапқа айналып, жаңа әдіс-тәсілдерді тиімді пайдалану қажеттігі артып келеді. Мұғалімнің шеберлігі қандай жоғары болса да оқушының белсенділігін туғыза алмаса білім күткен нәтиже бермейді.
Осыған орай жаңартылған оқу бағдарламасы бойынша біліктілікті арттыру мақсатындағы курс барысында Іле ауданының бастауыш сынып мұғалімдері № 12 орта мектепте жаңашыл әдіс-тәсілдердің негіздерін үйренуде. Жаңартылған білім беру мазмұнын түсініп меңгерген мұғалім жаңа оқу әдіс-тәсілдерін жас ұрпақ бойына сіңіре алады. Бастауыш мектептің мұғаліміне ақпаратты іздеу, мазмұнын түсіну, жауап беру, талдау дағдыларын үйрету мақсатында ақпараттық коммуникациялық технологияларды пайдалану жолдары да үйретілуде.
Жаңа оқу бағдарламасының ерекшелігі – жаңа әдіс-тәсілдер, технологиялар арқылы оқушылардың бойында ХХІ ғасыр дағдыларын дамыта отырып, адам, табиғат және қоғам туралы білімдерін толықтыруында. Жаңартылған бағдарлама аясында белсенді оқу, бірлескен оқу, саралау, пәнаралық байланыс, танымдылық қажеттіліктерін қалыптастыру, оқу әңгімелері, электронды оқу және жаңа технологияларды пайдалану, қолдану тәсілдері үйретілуде. Оқу үдерісінде бағалаудың қызметі мен мүмкіндіктері аясын кеңейту, критериалды бағалау, дескриптор, рубрика арқылы бағалауды жүзеге асыру туралы мәліметтер беріліп отыр. Жүйелі кері байланыс орнату арқылы білім алушылардың өзін-өзі жетілдіріп отыруына жағдай жасау басты мәселе болып табылады.
Бүгінде бастауыш сынып мұғалімдері оқу курсынан алған білімдерін мектепте жүйелі пайдалануда. Жаңартылған оқу бағдарламасын, жаңа әдіс-тәсілдерді қолдану арқылы жас ұрпақты білім нәрімен сусындатып, талантты, жігерлі, дарынды шәкірттердің қатарын көтеру – ұстаздардың ізгі мақсаты.
З. АСЕМЖАНОВА,
«Өрлеу» «БАҰО» АҚ филиалы Алматы облысы ПҚБАИ басқару және білім сапасы кафедрасының аға оқытушысы,
Ж. Таймағамбетова,
№ 16 орта мектептің бастауыш сынып мұғалімі
Іле ауданы
