Еліміздің басты құндылығы – адам. Оның құқықтары мен бостандықтары Конституциялық деңгейде нақты әрі айқын қорғалады. Әсіресе, білім алу құқығы – мемлекеттің басты міндеттерінің бірі ретінде бекітіледі. Бұл – ұстаздар мәртебесін арттыруға, білім беру сапасын көтеруге, инфрақұрылымды дамытуға нақты құқықтық негіз. Осындай сарындағы әңгімені «Әділетті және прогрессивті Қазақстанның Халықтық Конституциясы үшін!» Жалпыұлттық коалициясының өкілдері Қуаныш Сайлаубай, Гүлсина Тұлымшақова, Айбол Қасеновтер «Темірбетон» серіктестігінің ұжымымен кездесуде сөз етті.
Жалпыұлттық коалицияның міндеті – жаңа мәтіндегі Конституция турасында түсіндіру болса, спикерлер сол үдеден шықты. Себебі, олар, аталмыш құжат – еліміздің ертеңін айқындайтын, жастарымыздың сапалы білім алуына кепіл болатын стратегиялық шешім екенін жеткізді. Шараға қатысушы түсіндірме топ қатысушыларға Конституциядағы жаңартулардың маңыздылығы қарапайым әрі түсінікті тілмен жеткізді. Құқықтық реформалардың ел дамуына, әділ сот төрелігіне, азаматтардың қорғалуына әсері туралы нақты мысалдар келтірді.
– Жаңа Конституция жобасы – мемлекеттің құқықтық және саяси жүйесін заман талабына сай жетілдіруге бағытталған ауқымды құжат. Ол билік тармақтарының өзара тепе-теңдігін нақтылауды, азаматтардың құқықтары мен бостандықтарын қорғау тетіктерін күшейтуді және мемлекеттік басқару құрылымын тиімді етуді көздейді. Конституциялық өзгерістердің басты мақсаты – «Күшті Президент – ықпалды Парламент – есеп беретін Үкімет» қағидатын институционалдық тұрғыдан бекіту, – деді Гүлсина Тұлымшақова.
Өз кезегінде Қуаныш Сайлаубай жаңа жобада әлеуметтік кепілдіктердің күшейтілуі, еңбек құқықтарының қорғалуы және әділетті қоғам құру қағидаттары айқын көрініс тапқанын атап өтті. Ал, Айбол Қасенов жобаның негізгі бағыттары мен жаңашыл реформаларын таныстырып, цифрлық технологияларды қолдану, сот және құқық қорғау жүйесін жетілдіру мәселелеріне ерекше назар аударды. Жиын соңында спикерлер ұжым мүшелерін тағдыршешті сәтте ел болашағына дұрыс таңдау жасауға шақырды.
«Жетісу-Ақпарат»
