Қаратал ауданы Жаңаталап ауылында қазақ әдебеитеніде детектив жанрының негізін қалаушы, белгілі қаламгер Кемел Тоқаевтың 100 жыл толуына орай ас беріліп, ауқымды спорттық шаралар өтті.
Әуелі мерекелік шараның ашылу салтанатында облыс әкімі Бейбіт исабаев Президент Қасым-Жомарт Тоқаевтың құттықтау хатын оқыды. Артынша республикалық «Кемел қаламгер» байқауының жеңімпаздары мен жүлдегерлері марапатталды. Байқауға еліміздің әр өңірінен 300-ден астам жан қатысты. Арасында оқушылар мен ұстаздар бар. Олар эссе, роман, проза жанрлары бойынша сынға түсті. Бұл байқауды Кемел Тоқаев атындағы қайырымдылық қоры жыл сайын өткізуге ниетті.
Ғасырлық той аясында қазақ күресінен Әлем кубогы өтті. Кілемге 22 мемлекеттен 200-ден астам балуан қатысты. 8 салмақ бойынша сынға түскен Қазақстан құрамасының балуандарынан Бекет Жүніс (55 келі), Ержан Еренғайып (60 келі), Нұрболат Ізімғалиев (66 келі), Алтынбек Аусағитов (100 келі) және Мәди Еділбаев (+100 келі) чемпион болды. Одан бөлек жиналған жұртшылық арасында тоғызқұмалақ, садақ ату, қой көтеру бойынша жарыс ұйымдастырылды. Үздік шыққандарға арнайы сый-сияпат көрсетілді. Атқұмарлар үшін құнан, топ бәйге және аламан бәйге ұйымдастырылды. Бәйге жолына 230-ға жуық тұлпар шықты. Аламан бәйгеде мәре сызығын қатар кесіп өткен қос шабандоз Хамза Амангелді мен Бекзат Ділдаханға Кемел Тоқаев атындағы қайырымдылық қордың атынан Land Cruiser 300 көлігі берілді.
«ЖЕТІСУ-АҚПАРАТ»
