Елордада ішкі істер органдарының үздік қызметкерлері мен ардагерлерін марапаттау рәсімі өтті, – деп хабарлайды Polisia.kz.
Бұл шара ел тыныштығы мен қоғамдық қауіпсіздікті қамтамасыз етіп жүрген полиция қызметкерлерінің ерлігі мен адалдығына көрсетілген құрмет болды.
Іс-шара барысында Ішкі істер министрі Ержан Сәденов Қазақстан Республикасы Президентінің 2025 жылғы 21 қазандағы Жарлығына сәйкес сала үздіктеріне мемлекеттік наградалар табыс етті.
«Ерлігі үшін» медалімен Мұхтар Нұрмұхамбетов марапатталды. Ол биыл 23 наурызда Ескелді ауданында болған төтенше жағдай кезінде мұздай суда қалған екі азаматтың өмірін құтқарып қалған. Оқиға орнында полиция қызметкерлері Мұхтар Ғалымжанұлы мен Байбол Бекқазы дер кезінде көмек көрсетіп, ерлік танытқан.
Сондай-ақ Құрмет грамотасы Жетісу облысы бойынша ішкі істер органдары мен Ұлттық ұланның ардагері Есенгелді Төлегенұлына табысталды. Ол ішкі істер жүйесін дамытуға қосқан еңбегі мен қоғамдық белсенділігі үшін Қазақстан Республикасының Премьер-Министрі Олжас Бектеновтың қолынан марапат алды.
Салтанатты жиында қызметтік борышын атқару кезінде қаза тапқан батырлар да еске алынды. Солардың бірі – Жетісу облысының учаскелік инспекторы Алмас Алинов. Ол 2006 жылы Ақтұбек ауылындағы отбасылық жанжал кезінде әйел мен балаларды қорғап жүріп қаза тапқан еді.
Алмас Иманмалықұлының ерлігі «Жауынгерлік ерлігі үшін» медалімен қайтыс болғаннан кейін марапатталды. Артында жұбайы Айнагүл Алинова мен үш баласы қалды. Айнагүл Әділжанқызы бүгінде жолдасының ісін жалғастырып, ішкі істер органдарында қызмет етіп келеді.
Марапаттау рәсімі полиция қызметкерлерінің батырлығы, адалдығы мен абыройы – қазақстандық полицейдің басты құндылықтары екенін тағы бір дәлелдеді.
