Нұр-Сұлтан қаласында өтетін ауылшаруашылық жәрмеңкесіне облыстағы 17 аудан, 3 қала және «Жетісу» ӘКК қатысады. Аймақтағы кәсіпорындар шамамен 160 миллион теңге сомасына 330 тонна ауылшаруашылық өнімдерін сатуды жоспарлап отыр.
Балқаш ауданы өзінің бренді саналатын күріш пен балықтан бөлек жеміс-жидек, пияз жөнелтті. Ал, Іле ауданынан ел астанасына бақша өнімдері мен «Алатау құс» фабрикасынан шығатын өнім жол тартты.
Алматы облысы ауылшаруашылық басқармасы басшысының орынбасары Қанат Есболатовтың айтуынша, жәрмеңке сөресіне балық, сүт, жеміс-жидек пен танымал алматылық алма, бал қойылады. Сондай-ақ, брендке айналған «Made in Narynqol» картобы да сатылымда. Тауар бағасы 10-15 пайызға төмендетілген. Яғни, қала тұрғындарының тұрмысқа қажетті азық-түлік өнімдерін нарықтағы бағадан арзандатылған бағамен сатып алуға мүмкіндігі бар.
«Осының барлығы елордалық базарларда бағаны тұрақтандыруға ықпал етеді», – дейді ұйымдастырушылар. Одан бөлек, тұрғындар сапалы көкөніс пен картоп өнімдерімен қамдана алады.
Рамазан ЕЛЕШЕВ
Іле ауданы
