Облыс әкімінің орынбасары Диас Есдәулетов «Turkic Skills – 2025» халықаралық кәсіби шеберлік чемпионатында жеңімпаз атанған Талдықорған жоғары политехникалық колледжінің студенті Зере Шакен мен оқытушысы Айгерім Бауыржанқызын қабылдап, ізгі тілегін білдірді.
Кездесуде сөз алған аймақ басшысының орынбасары:
– Ақтау қаласында «Жұмысшы мамандықтар жылы» аясында өткен «TurkicSkills – 2025» чемпионатына Түркия, Әзірбайжан, Мажарстан, Өзбекстан, Қырғызстан және Қазақстаннан 70-ке жуық колледж студенттері мен жас маман қатысты. Олар инженерия, ақпараттық технологиялар, өндіріс, робототехника және қызмет көрсету салаларын қамтитын 10 құзыреттілік бойынша бақ сынады. Аталмыш додада облысымыздың намысын қорғаған Зере Шакен «графикалық дизайн» аталымы бойынша жеңімпаз атанды, – дей келе ақжарма тілегін ақтарып, Алғыс хат пен сыйлық табыстады.
Айта кетейік, I Халықаралық «TurkicSkills – 2025» кәсіби шеберлік чемпионатында 6 алтын, 2 күміс медаль еншілеген ел құрамасы жарыс жеңімпазы атанды.
Айдар ҚАЛИЕВ
