Биыл Кеген ауданына қарасты Жылысай ауылдық округінде 4 мыңға тарта ірі қара, 20 мыңға тарта қой-ешкі, 2300 бас жылқы қыстатылуда. Қазіргі таңда Жылысай өңірінде 47 қыстауда малшы қауымы қатал қысқа қажыр-қайраттарын қарсы қойып, табандылықпен еңбек етуде. Округ аумағындағы «Жандос», «Дарқан», «Айдын» шаруа қожалықтарының жағдайлары жақсы.
Жалпы, мал азығының сенімді қоры жасалған. Енді тек қырдағы ағайын үшін мал қыстатуды ұйымшылдықпен, өз деңгейінде аяқтаса болғаны.
Жылысай ауылдық өңіріне қарасты «Қошан» шаруа қожалығының жағдайы жақсы. Қожалықты ата кәсібін жалғастырып жүрген Ерғалым Қошанов атты еңбекқор азамат басқарады. Аталған қожалық асыл тұқымды ірі қара мен жылқы өсіруге бағытталған. Қазір қожалықта жүзге тарта ірі қара, 60 жылқы өсірілуде. Малдың тең жартысынан астамы аналық. «Қошан» шаруашылығы сапалы семіз ет өндірумен, жаз маусымында сүт, қымыз дайындаумен айналысады. Осы арқылы қожалықтың жағдайы жыл өткен сайын жақсарып келеді.
– Биыл суық ерте түсті. Қыс қатал мінезін танытып тұр. Дегенмен, қар жұқа. Өріс ашық. Қолда бар мүмкіндігімізді пайдаланып, мал азығын дайындап алдық. Мал қыстату науқанын көңілдегідей аяқтап шығамыз деген сеніміміз мол, – дейді шаруа қожалығының жетекшісі Ерғалым Қошанов.
Қазір «Қошан» шаруа қожалығының төрт түлік малы Малай батыр кесенесінің маңына орналасқан. Қыстаудағы тіршілік сәтімен жалғасуда.
Қанат БІРЖАНСАЛ,
Кеген ауданы
