Апта басы Кербұлақ ауданы үшін қуанышпен басталды. Сарыөзек ауылында күрделі жөндеу, реконструкциялау және сейсмикалық күшейту жұмыстары жүргізілген орталық аудандық аурухана мен Көксай ауылында 60 оқушыға арналған жаңа мектеп пайдалануға берілді. Аудандық аурухана 1986 жылы салынған. Содан бері күрделі жөндеу көрмеген. 2025 жылдың күзінде облыс басшылығының қолдауымен күрделі жөндеу және сейсмикалық тұрғыдан күшейту жұмыстары басталған.
Сарыөзек ауылындағы салтанатты шараға аудан тұрғындары, медицина қызметкерлері қатысты. Жиында Кербұлақ ауданының әкімі Жанат Жүнісбеков құттықтау сөз сөйлеп, халық денсаулығын нығайтудың ел үшін маңызы зор екенін атап өтті. Айтуынша, жаңғыртудан өткен аурухана арқылы ақхалаттылар бұқараға көрсетілетін қызмет сапасын арттырады.
– Соңғы 2 жылда ауданда 20 медициналық нысан пайдалануға берілді. Осындай қолдаулар нәтижесінде тұрғындар сапалы медицинаға қол жеткізді. Күрделі жөндеуден өткен аурухана барлық қажетті заманауи жабдықпен қамтылды. Ауданда денсаулық сақтау саласын дамыту одан әрі жалғасын табады, – деді аудан әкімі Жанат Жүнісбеков.
Салтанатты шарада облыстық денсаулық сақтау басқармасының басшысы Асқар Садықов пен аудан прокуроры Елдос Омаров ізгі тілектерін жеткізсе, ақсақалдар кеңесінің төрағасы Бөкен Рысбеков ақ батасын берді.
120 орынды жаңартылған стационар заманауи медициналық құрал-жабдықтармен қамтылып, тұрғындарға сапалы алғашқы және мамандандырылған медициналық көмек көрсетуге дайын. Аурухана құрылымында терапия, хирургия, травматология, перзентхана, педиа-трия және инфекциялық бөлімшелер, сондай-ақ диагностикалық қызмет пен реанимация бөлімі жұмыс істейді. Жаңалықтардың қатарында госпитальдық фармация бөлімшесінің іске қосылуы және хирургиялық оталардың қауіпсіздігі мен сапасын қамтамасыз етуге бағытталған «таза аймақтардың» енгізілуі бар.
34 жыл табан аудармай аудандық ауруханада тер төгіп жүрген Элвира Ақшолақова өзі үшін емес, аудан тұрғындары үшін аса қуанышты екенін жеткізді. Айтуынша, жаңғырған нысанда бар жағдай жасалған.
– Ауруханамыздың іші жарық, жайлы. Бүгінгі көңіл-күйіміз де ерек. Өзім жұмыс істейтін аурухананың зертханасында жабдықтардың дені тозған еді. Қазір 100 пайыз жаңарды. Ендігі тілек, халықтың денсаулығы сыр бермей, ақхалаттылардың көрсетер қызметінің сапасы артсын, – дейді Э. Ақшолақова.
Көксай ауылының тұрғындары да жаңа мектепті көптен күтті. Апта басында мұндағы ағайын шын шаттанды. Онысын жаңа мектептің ашылуында аңғартты. Себебі, салтанатты шараға тұтас ауыл жиылғандай.
Мерейлі сәтте облыстық білім басқармасының басшысы Дәурен Жүнісов, аудан әкімі Жанат Жүнісбеков сөз сөйлеп, ауыл тұрғындарын құттықтады.
– Мемлекет басшысының қала мен ауыл мектептеріндегі білім сапасының алшақтығын азайту тапсырмасына сәйкес ауданымызда елеулі қарекет бар. Соның бір дәйегі – Көксай ауылының мектебі. 60 орынды жаңа мектеп Білім беру инфрақұрылымын жаңғырту қорынан бөлінген қаражатқа салынды. Мұнда оқушылардың жан-жақты дамуына қолайлы әрі қауіпсіз жағдай жасалған. Бастысы, жаңа мектеп ұстаздары алымды да қарымды шәкірт тәрбиелесін, – деді аудан әкімі Жанат Төлегенұлы.
Мердігер «Капиталстрой» ЖШС-нің басшысы Нұрсұлтан Нұрбаев жаңа ғимараттың символикалық кілтін мектеп директоры Әсем Сарыбаеваға салтанатты түрде табыстады. Мұнан соң қадірлі меймандар заманауи мектеп ғимаратымен танысты.
Жаңа білім ордасында білім алатын 5 немересі бар 73 жастағы кейуана Заида Макаева ауыл балалары үшін шын қуанғанын жасырмады. Ақжаулықты ана ауыл келіндері көпбалалы ана атанып, мұндағы халық саны артып, балабақша ашылса деген тілегін де жеткізді.
– Еліміздің болашақ тұтқасы осы балалардың қолында. Қолайлы жерде білім алған оқушылар ел ертеңін жарқын етеді. Ауылымызда жаңа мектеп есігін айқара ашып, шын қуандық. Ел тізгіндеген азаматтарға алғысымыз шексіз, – деді Заида Макаева.
Дастанбек САДЫҚ
