Қарасай ауданында биыл жүзеге асырылған инвестициялық жобалардың қатарында «Якар» жауапкершілігі шектеулі серіктестігіне қарасты кондитерлік зауыты да бар. Түрік кәсіпкері Якар Дженгиздің қаржыландыруымен салынған кәсіпорында какао, шоколад және қант негізінде жасалатын түрлі мәмпәси өндірілетін болады.
Жуырда ғана ресми ашылуы болып өткен кәсіпорынның аумағы 4,4050 гектар жерді алып жатса, өндірістік ғимараттың көлемі 1,1350 гектарды құрайды. Бүгіндері 48 адам еңбек етіп жатқан мекеме толық қуатымен жұмыс істей бастағанда тағы 42 жұмыс орны ашылады деп күтілуде.
2018 жылдан бастап қолға алынған бұл жобаны жүзеге асыру үшін біршама дайындық шаралары атқарылғаны белгілі. Атап айтқанда, электр желілері тартылып, 150 метрден таза су шығаратын ұңғыма тесіліп, 25 текше метр суды қабылдауға қабілетті мұнара салынған. Кәсіпорынды көгілдір отынмен қамтамасыз ету мәселесі де дұрыс шешімін тапқан.
Осылайша Қарасай ауданының аумағында дастарқанымыздың сәні, бүлдіршіндеріміздің қуанышы боларлық тағы бір кондитерлік өндіріс орны жұмыс істей бастады. Кәсіпорын жылына 2,400 тонна шоколад және 3,600 тонна сорғыш кәмпиттер, барлығы 6 тонна тәтті өнімдер шығара алады. Зауыт өз өнімдерін Қазақстаннан өзге ТМД елдері мен Моңғолия, Қытайға экспорттауды жоспарлап отыр.
«ЖЕТІСУ-АҚПАРАТ»
