Жылысай ауылдық округіне қарасты Майбұлақ өңіріндегі Әйгерім Алғадай басқаратын «Димаш» шаруа қожалығында көктемгі төл алу науқаны сәтті жалғасуда.
Қожалықтың мал қорасы заманға лайық салынған, жылы да жайлы. Қыстаудағы электр жарығы бар тұрғын үй, моншасы да ыңғайлы. Қой төлдейтін қоралардың алдына төлшілерге арналған жылы мекенжай орналастырылыпты.
Қожалықта 1200 бас қой бар. Оның ішіндегі 800 бас саулықтың әр жүзінен жүз қозыдан ілесіп жатыр. Қой да, қозы да аман. Күн ұзарып әрі жайдары мінезін таныта бастағалы қозылар да ширай түсуде.
Әсілі, көктем маусымының тамаша көрінісі осы өрісті толтырып жатқан қозы-лақ. «Түлік төлден көбейеді» дегендей, бұған қуана қарайсың. Шаруа қожалығы басшылығының көктемгі төл алу науқанына айтулы үлесін қосып келе жатқан бас шопан Ербол Қапезов пен төлші Талғат Әлиасқаров, Ерғалым Баймолдаев, Қуаныш Әбділбаев секілді бесаспап төлші азаматтарға айтар алғыс мол.
Қанат БІРЖАНСАЛ
Кеген ауданы
