Маңызды кездесу елде жүргізіліп жатқан ауқымды саяси реформалар аясында ұйымдастырылып, жаңа Конституция жобасының мәні мен маңызын кеңінен түсіндіруге бағытталды. Сондай-ақ, ұсынылып отырған конституциялық өзгерістердің мазмұнын, партияның ұстанымын жеткізу мақсатында қоғам өкілдерімен ашық пікір алмасу көзделді.
Кездесу барысында мемлекеттік басқару жүйесін жаңғырту, әлеуметтік әділеттілікті нығайту, азаматтардың құқықтары мен бостандықтарын кеңейту мәселелері кеңінен қозғалды.
Жиында сөз сөйлеген облыстық партия филиалының жетекшісі Олжас Ибраимов жаңа Конституция жобасының ауқымына тоқталды.
– Жаңа Конституция жобасы – ел дамуының жаңа кезеңіне жол ашатын маңызды құжат. Құжаттың 80 пайыздан астамы жаңартылып, мемлекеттік басқару жүйесінің философиясы қайта қаралып отыр. Бұл уақыт талабына сай жасалған түбегейлі реформалар, – деді.
Оның айтуынша, бір палаталы жоғары өкілді орган Құрылтай құру, еңбек ету құқығын конституциялық деңгейде бекіту және адам капиталына басымдық беру Қазақстан Халық партиясының саяси бағытымен толық сәйкес келеді.
Партия ардагері Сәуле Бигарова өз сөзінде Конституция жобасының әлеуметтік сипатына назар аударды.
– Ұсынылып отырған өзгерістер халықтың күнделікті өміріне тікелей әсер етеді. Әлеуметтік әділеттілікті күшейту, еңбек құқығын нақты бекіту қоғам сұранысынан туған маңызды шешімдер, – деді ол.
Ал облыстық мәслихаттың депутаты, партия белсендісі Ермұхан Жүнісхан жаңа құжаттың өңірлер үшін маңызды екенін атап өтті.
– Бұл өзгерістер жергілікті өкілді органдардың рөлін арттырады. Мәслихаттардың жауапкершілігі күшейіп, халықтың шешім қабылдау процесіне қатысу мүмкіндігі кеңейеді. Бұл өңірлік дамуға оң әсерін тигізеді, – деді депутат.
Осыдан кейін сөз алған қатысушылар жаңа Конституция жобасына қатысты өзекті мәселелерді талқылап, қоғам мен партия арасындағы диалогты нығайтуға мүмкіндік беретінін жеткізді. Ұсынылып отырған өзгерістердің елдің ұзақмерзімді дамуына бағытталғанын атап өтіп, өз пікірлері мен пайымдарын да ортаға салды.
Кездесу ашық пікір алмасу форматында өтіп, қатысушылар Ата заң жобасына қатысты сауалдарын қойып, нақты жауаптар алды. Ұйымдастырушылар мұндай түсіндіру кездесулері алдағы уақытта да жалғасатынын жеткізді.
Қажет АНДАС
