Жетісу облысына жұмыс сапарымен келген ҚР Құрылтайының депутаты Екатерина Смолякова, Ауыл шаруашылығы вице-министрі Назгүл Хатепова және Қаржы вице-министрі Дәурен Темірбеков өңірдің белсенді жастарымен кездесті, – деп хабарлайды 7-su.kz ақпараттық порталы.
Талдықорғандағы «Жетісу жастары» орталығында өткен басқосуда Мемлекет басшысының «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауында белгіленген басым бағыттар сөз болды.
Алдымен делегация мүшелері орталықтың жұмысымен танысып, жастарға арналған жобалар мен бастамалардың жүзеге асырылу барысын көрді.
Кездесу барысында білім беру, ғылым, цифрландыру, жасанды интеллект, кәсіпкерлік, ауыл шаруашылығын дамыту және жастарды жұмыспен қамту мәселелері талқыланды.
Ауыл шаруашылығы вице-министрі Назгүл Хатепова аграрлық саланы жаңғырту, ауыл жастарының кәсіпкерлік әлеуетін арттыру және өндіріске заманауи технологияларды енгізу бағытындағы жұмыстарға тоқталды.
Ал Қаржы вице-министрі Дәурен Темірбеков мемлекеттік қаражатты тиімді пайдалану, қаржылық сауаттылықты арттыру және жастардың экономикалық мүмкіндіктерін кеңейту мәселелеріне назар аударды.
Құрылтай депутаты Екатерина Смолякова жастардың ел дамуындағы рөліне тоқталып, олардың қоғамдық бастамаларға белсенді араласуының маңызын атап өтті.
Ашық пікір алмасу кезінде жастар өздерін толғандырған сауалдарын қойып, жұмыспен қамту, сапалы білім алу, кәсіпкерлікті қолдау және жаңа технологияларды меңгеру жөнінде ұсыныстарын ортаға салды.
Кездесу мемлекеттік органдар өкілдері мен жастар арасындағы ашық диалог алаңына айналып, ел дамуына қатысты өзекті мәселелерді бірлесе талқылауға мүмкіндік берді.
