Forbes басылымы Қазақстанның ең бай әйел кәсіпкерлерінің жаңартылған рейтингін жариялады. Тізімге 25 кәсіпкер енген, – деп хабарлайды 7-su.kz ақпараттық порталы Ulysmedia.kz сайтына сілтеме жасап.
Рейтинг авторларының мәліметінше, әйел кәсіпкерлердің активтері негізінен отбасылық бизнеске немесе әріптестік құрылымдарға байланысты қалыптасқан. Атап айтқанда, капитал мұрагерлік, неке одағы немесе іскерлік топтардағы үлес арқылы жинақталған.
Сонымен қатар, әйелдер тек үлес иелері ретінде ғана емес, басқарушы ретінде де белсенді рөл атқарады. Кәсіпкерлердің басым бөлігі жаңа өнімдер шығарып, бизнесті әртараптандыруға күш салып отыр, – дейді рейтинг авторлары.
Жалпы байлық көлемі шамамен 8,1 миллиард долларды құрайды. Алайда қаржының бөлінуі біркелкі емес: капиталдың жартысынан астамы бір қатысушыға тиесілі, ал алғашқы бестік жалпы байлықтың шамамен 87%-ын иеленеді.
Рейтингтің бірінші сатысында Динара Құлыбаева тұр. Оның байлығы 5,4 миллиард долларға бағаланған. Күйеуі Тимур Құлыбаевпен бірге банктер мен жылжымайтын мүлік саласындағы ірі активтерге ие. Атап айтқанда, «АЛМЭКС» холдингтік тобы мен Mercury Properties компанияларына қатысы бар. Сонымен қатар, ол NNEF қоғамдық қорының серіктесі.
Екінші орында – Мукадасхан Ибрагимова. Оның байлығы 650 миллион долларды құрайды. Ол Eurasian Resources Group және «Еуразиялық қаржы компаниясы» акционерлік қоғамындағы үлестерімен белгілі.
Үшінші орынға Дариға Назарбаева жайғасқан. Оның байлығы 550 миллион долларға бағаланған. Нұрәлі Әлиевпен бірге «Европа плюс Қазақстан» радиостанциясын иеленеді. Сондай-ақ «Независимый Телевизионный Канал», «Радиосити» телерадиокомпаниясы, «DLS Group» холдингі арқылы «Наружная Реклама-Регионы» және «Телефабрика «Дала» компанияларында үлесі бар.
Алғашқы бестікке Анжела Сарсенова (249 млн доллар) мен Айжан Есім (207 млн доллар) да енді.
Тізімнің келесі бөлігінде бөлшек сауда, қаржы, жылжымайтын мүлік, өнеркәсіп және білім беру салаларында жұмыс істейтін кәсіпкер әйелдер бар. Олардың қатарында Айдан Сүлейменова, Ханшаим және Жанна Сейтжановалар, Алена Сүлейменова, Гаухар Каппарова, Гүлнар Досаева, Раушан Сағдиева, Ирина Козлова мен Александра Соколова, Любовь Дружинина, Сәуле Сейсембаева, Элеонора Баталова, Карина Сарсенова, Әлия Маханова, Наталья Акентьева, Сәуле Зейнолла, Амина Қасымова, Сандуғаш Кемельбаева, Галина Зкрияева және Амина Ажмаганбетова бар.
Рейтингті Гаухар Абыкаева мен Жанна Кан қорытындылайды.
