Жетісу университетінде жастар арасында құқықтық мәдениетті қалыптастыру және салауатты өмір салтын насихаттау мақсатында танымдық-профилактикалық іс-шара өтті, деп хабарлайды 7-su.kz ақпараттық порталы.
Кездесуді Жетісу облысы полиция департаментінің есірткі қылмысына қарсы іс-қимыл басқармасы мен кинологиялық қызмет орталығының мамандары ұйымдастырды. Полицейлер студенттерге есірткінің адам өміріне тигізер зияны туралы айтып, «қалтаға салу» (закладка) сияқты заңсыз әрекеттер үшін қылмыстық жауапкершілік бар екенін түсіндірді.
Кинологтардың көрнекі көрсетілімі студенттердің ерекше қызығушылығын тудырды. Қызметтік ит жасырылған үлгіні тез тауып, өз шеберлігімен тәнті етті. Көрініс залда үлкен әсер қалдырып, студенттер жылы қол шапалақпен қошемет көрсетті.
Шшара барысында жастар полицейлерге түрлі сұрақтар қойып, кинологтардың жұмысы мен иттерді үйрету әдістеріне қызығушылық танытты. Кездесу соңында қатысушылар қызметтік итпен және полицейлермен естелік суретке түсті.
Мұндай шаралар жастарға салауатты өмір салтын ұстанудың, заңды құрметтеудің және дұрыс өмірлік ұстаным қалыптастырудың маңызын түсіндіруге бағытталған.
