Жетісу облысы полиция департаментінде Халықаралық кітап күніне арналған ерекше мерекелік іс-шара өтті. Мақсаты – жас полицейлердің бойында рухани құндылықтарды нығайтып, кітаптың өмірдегі маңызын ұғындыру.
Шараға ішкі істер органдары мен Ұлттық ұланның ардагерлері арнайы шақырылып, болашақ тәртіп сақшыларын мерекемен құттықтады. Ардагерлер кітаптың адамның кәсіби және тұлғалық дамуына тигізер ықпалы туралы ой бөлісіп, өз өмірлеріндегі әсерлі сәттермен бөлісті.
Олар жас қызметкерлерге мінез қалыптастыру, ой-өрісті кеңейту және моральдық құндылықтарды нығайтуда маңызды рөл атқарған әдебиеттерді ұсынды. Ардагерлердің бірі: «Кітап — даналықтың көзі. Ол кәсіби өсуге ғана емес, ең күрделі жағдайда да адамгершілікті сақтауға көмектеседі», – деп атап өтті.
Жас полицейлер ардагерлердің әңгімесін қызыға тыңдап, өздері оқыған шығармалар туралы пікір алмасты. Бұл кездесу тек кітапқа деген құрмет қана емес, буындар арасындағы байланысты нығайтатын, рухани сабақтастықты жалғайтын мәнді шара болды.
Фото: Polisia.kz
