Солтүстік Қазақстан облысының тұрғыны алаяқтардың арбауына түсіп, 2 миллион теңгеден астам қаражатынан айырылды, – деп хабарлайды 7-su.kz ақпараттық порталы Polisia.kz-ке сілтеме жасап.
Петропавл қаласында 59 жастағы әйелге белгісіз адам қоңырау шалған. Ол өзін бұрынғы жұмыс орнынан хабарласып тұрған кадр бөлімінің заңгері ретінде таныстырған. Белгісіз азамат әйелдің жеке ісін біреулер алып кеткенін айтып, мән-жайды анықтау үшін басқа «заңгердің» байланыс нөмірін жолдаған.
Осыдан кейін жәбірленушіге өзін құқық қорғау органының қызметкері және банк менеджері ретінде таныстырған адамдар хабарласқан. Олар әйелді интернет-алаяқтық тәуекелі жоғары топқа кіргеніне сендірген. Әңгіме барысында қауіп деңгейі үнемі күшейтіліп отырған.
Белгісіз тұлғалар оның банк аккаунтын бұзуға әрекет жасалып жатқанын айтып, қаражатты сақтау үшін ақшаны «қауіпсіз шотқа» аудару қажеттігін жеткізген. Әйел алаяқтардың нұсқауын орындап, 2 миллион теңгеден астам жинағын көрсетілген шотқа аударған.
Кейін жәбірленуші алаяқтардың құрбаны болғанын түсінген. Қазіргі уақытта аталған дерек бойынша тиісті тергеу амалдары жүргізіліп жатыр.
