ҚР ЕХӘҚМ Мемлекеттік еңбек инспекциясы комитеті төрағасының м.а Ерболат Абулхатин ОКҚ баспасөз мәслихатында еңбек заңнамасының сақталуын бақылауды күшейту және жұмыскерлердің еңбек құқықтарын қорғау шараларына тоқталып өтті.
Оның айтуынша, былтыр заңнамаға сәйкес еңбек қатынастары бойынша мемлекеттік бақылау функциялары жергілікті атқарушы органдардан Еңбек министрлігіне берілді. Сонымен қатар қызметкердің денсаулығына келтірілген зиянды өтеу кезінде кінәсін есепке алмауды, 1400 зардап шеккен адамға өмір бойы төлем жүргізуді, өмірді сақтандыру компаниялары сыйақысының 12%-ын оңалту мен алдын алуға бағыттауды, зардап шеккендерге санаторлық емделуге 100 айлық есептік көрсеткіш мөлшерінде төлем жүргізуді көздейтін заң қабылданды. Еңбек қауіпсіздігі және еңбекті қорғау талаптарының бұзылуы үшін әкімшілік жауапкершілік күшейтілді.
«Мемлекеттік еңбек инспекторларының бақылау қызметінің тиімділігін арттыру мақсатында кәсіпорындарды профилактикалық бақылау тізімін қалыптастыру процесі автоматтандырылды. Өндірістік жазатайым оқиғаларды тергеуге арналған «FSM» мобильдік қосымшасы әзірленді. «Еңбек қауіпсіздігі және еңбекті қорғау» кәсіби стандарты бекітілді», – деді спикер.
Одан бөлек, келесі жұмыстар қолға алынды:
— нысандарды аттестаттаудан жұмыс орындарындағы кәсіби тәуекелдерді бағалауға көшу;
— тәуекелдерді бағалау жүргізетін ұйымдарға қойылатын талаптарды және жазатайым оқиғалар кезінде олардың мемлекеттік сараптамадан өтуін енгізу;
— тексерулердің жаңа форматы: ақпараттық жүйе деректері негізінде тәуекелдерді анықтау, тексерулер туралы алдын ала хабарландыруды алып тастау, жоспардан тыс тексерулер кезінде тексеру парақтарын жою.
Нәтижесінде жұмыс орындарындағы тәуекелдерді азайту, еңбек инспекциясының жұмысының тиімділігін арттыру және ұлттық тәжірибені халықаралық еңбек стандарттары мен нормаларына сәйкестендіру күтілуде.
ОКҚ
