Қазір ел ұландарын әскерге шақырудың күзгі кезеңі жүріп жатыр. Жазиралы Жаркент өңірінен биылғы күз айларында 80-ге жуық жас әскер қатарына аттандырылады. Денсаулығы жан-жақты тексеріліп, жасақталған 4 топ қыркүйек айында әскер киімін киіп, қолына қару алып, ел шебін қорғауға аттаныпты.
Жақында тағы бір сондай топқа Жаркент қаласындағы «Өркен» саябағындағы соғыс ардагерлеріне арналып жасалған ескерткіш кешенінің алдында әскерге шығарып салу рәсімі өткізілді. «Отан қоғау – парызым» деп аталған бұл шараға әскер қатарына шақырылған жас ұландардың ата-аналары, өңір жастары, қоғамдық ұйымдардың өкілдері қатысты. Жиында аудан әкімінің орынбасары Қанат Досмайылов, Панфилов аудандық қорғаныс істері жөніндегі бөлімнің бастығы Серік Асанов, аудандық Қарулы Күштер ардагерлері ұйымының төрағасы Алтай Күдеров, өңірлік еңбек ардагерлері ұйымының төрағасы Тоқтарбай Керімқұлов және ата-аналар сөз сөйлеп, жастарды Отан алдындағы міндеттерін абыроймен атқарып, еліне аман-есен оралуларына тілектестіктерін білдірді.
Салтанатты жиында өңір өнерпаздары патриоттық әндер орындап шараны әрледі. Әскерге аттанған жастар тобы жиыннан соң арнайы автобусқа отырып, сапарға аттанды.
Айдар ҚАЛИЕВ
