Кездесуде облыс прокуроры Бауыржан Альбертұлы бұл кездесудің басты мақсаттары жөнінде айта келіп, аудан тұрғындары заңдылықты сақтай отырып, бірнеше маңызды мәселеге ерекше назар аудару қажеттігін қадап айтты. Оның алғашқысы – өңірде есірткі заттарын пайдалануға жол бермеудің амалдарын барынша қатаң қадағалауды құқық қорғау орындарының басшылары мен кеден, шекара қызметкерлеріне тапсырды. Сол сияқты қазіргі таңда өріс алған алаяқтықтан, әсіресе интернет желілері арқылы қарапайым халықты алдап соғып жүргендерден аудан тұрғындарын барынша сақтандыру шараларын күшейту, оларға алданған жандардың орынсыз арланып, намыстанып, бойкүйездікке бой алдырмай аудан прокурорына, аудандық ішкі істер бөлімінің жауапты қызметкерлеріне шағымдануды сұрады. Басқа да мәселелерге тоқталды.
Жиында аудан прокуроры Бауыржан Тойбаев есепті мерзімде атқарылған жұмыстар мен құқықбұзушылық ахуалы жөнінде баяндама жасады. Өңірде өткен жылдың осы мерзімімен салыстырғанда қылмыс саны жалпы 9 пайыз төмендеп, 243-тен 236-ға дейін кеміген. Дегенмен кейбір қылмыс түрлерінің көрсеткіштері төмендемей тұр. Атап айтқанда денсаулыққа қасақана зиян келтіру фактілері 80 пайыз, интернет алаяқтық 65 пайыз, отбасындағы тұрмыстық қылмыс 35 пайыз, зорлық-зомбылық, тағы басқа ауыр қылмыстар айтарлықтай өскен. Қылмыс жасаудың алдын алу бағытында атқарылған іс-шаралар да біршама. Әсіресе жастар арасындағы профилактикалық жұмыстар жандандырылыпты. Аудандағы бірқатар оқу ошақтарында жасөспірімдермен кездесулер ұйымдастырылып, жастарға түсіндіру шаралары жасалған.
Кездесу барысында тағы басқа да маңызды мәселелер айтылды. Облыс прокуроры «Еңбек» кәсіпорнындағы жұмысшылардың жалақысын төлемеу фактісі бойынша талдау жасап, еңбекақының әлі төленбеген бөлігін осы айдың соңына дейін өндіруді кездесуге қатысып отырған құқық қорғау органдарының басшылығына тапсырды. Облыс прокуроры кездесуден кейін өзіне өтініш, шағым айту үшін алдын ала кезекке жазылған азаматтарды жеке-жеке қабылдады.
Мырзағали НҰРСЕЙІТ
