Қазақ «Енесі тепкен құлынның еті ауырмайды» дейді. Бірақ шындап тепсе, тән ғана емес, жан да ауырады. Бұған кешегі әлеуметтік желіде тараған бейнежазба дәлел. Кадрда 28 жастағы әйелдің өз баласын аяусыз тепкілеп, соққының астына алғаны анық көрінеді. Мұны көріп, төбе шашың тік тұрады.
Айтуларынша, бұл бейнежазбаны үйіне қонаққа келген құрбысы түсіріп алған. Әкімдік таратқан мәліметке сүйенсек, әйел 2020 жылдан бері заңды некеде. Сондай-ақ оның психиатриялық диспансерде арнайы есепте тұрғаны белгілі болды.
Осындай қатыгездік қазақ қоғамында бұрын болып па еді? «Балалы үй – базар, баласыз үй – мазар» деп, балаға аманаттай қараған ел едік қой. Ананың мейірімі – ұлттың мейірімі емес пе еді? Ендеше, біз қалай қатыгез де қасиетсіз болып кеттік?
Қазір аталған әйел қамауға алынды. Панфилов аудандық әкімдігінде оны ана құқығынан айыру мәселесі қаралып жатыр. Заң өз бағасын берер. Бірақ бұл тұтас қоғамның дерті екенін мойындамасақ, мұндай көріністердің қайталанбасына кім кепіл? Дәл осындай озбырлық басқа отбасылардан да шығуы мүмкін.
Санжар СҰЛТАНҒАЗЫ
