Қазақстанда құқықбұзушылықтың алдын алуға белсене қатысқан азаматтар алғыс хат, бағалы сыйлық немесе ақшалай сыйақымен марапатталатын болды. Бұл туралы 7-su.kz ақпараттық порталы хабарлайды.
Жаңа заң жобасына сәйкес, енді көшеде күдікті әрекет байқап, дер кезінде полицияға хабар берген кез келген тұрғын ынталандыру шараларына ие бола алады. Бұл бастама елдегі қоғамдық тәртіпті сақтауға қарапайым азаматтарды кеңінен тартуды көздейді.
Бұған дейін тәртіп сақтауға тек полиция жауапты болса, енді бұл іске мектеп пен аурухана қызметкерлері, БАҚ өкілдері және басқа да салалардағы мамандар да тартылмақ. Сонымен қатар, қарапайым тұрғындар да қоғамдық көмекші ретінде атсалыса алады. Олар көшелердегі тәртіпті бақылап, түсіндіру жұмыстарын жүргізеді, сондай-ақ құқықбұзушылыққа бейім тұлғаларды анықтауға көмектеседі.
Марапаттау рәсімін ұйымдастыру үшін әр өңірде арнайы комиссиялар құрылмақ. Бұл комиссиялар үміткерлерді іріктеп, оларға сыйақы тағайындаумен айналысады. Дегенмен, қоғамдық көмекшілерге тұрақты жалақы қарастырылмаған.
– Қоғамдық көмекшілерге жалақы төленбейді. Заң жобасында бұл нақты көрсетілген. Тек сыйақы беру қарастырылған. Аудандық мәслихаттар жанынан құрылған комиссияларға Ішкі істер министрлігі көмек көрсеткен азаматтардың тізімін жолдайды. Ал сыйақының мөлшері мен берілу жиілігін жергілікті әкімдіктер шешеді. Мысалы, кейбір әкімдіктер тоқсанына бір рет сыйақы тағайындауы мүмкін, – деді ішкі істер министрінің орынбасары Игорь Лепеха.
Мамандардың айтуынша, бұл бастама қоғамдық тәртіпті күшейтіп қана қоймай, азаматтық белсенділікті арттырады деген сенім бар.
