Қазақстан Республикасы Президентінің кеңесшісі Мәлік Отарбаев Жетісу облысына жұмыс сапарымен келіп, облыстың Полиция департаментінде жеке құраммен кездесті.
Кездесуге Жетісу облысы әкімінің орынбасары Диас Есдәулетов, құқық қорғау, төтенше жағдайлар және әскери құрылымдардың өкілдері қатысты.
Мәлік Нұржанұлы Мемлекет басшысының Ұлттық құрылтайда қойған талаптарын жеткізіп, қоғамда «Заң мен тәртіп» қағидасын орнықтырудың маңыздылығын атап өтті.
Сапар барысында Президент кеңесшісі Жедел басқару орталығының жұмысымен танысып, Полиция департаментінің музейін аралады. Сондай-ақ, ведомство қызметін жетілдіру, жас мамандардың кәсіби және адамгершілік дамуына қолдау көрсету, ұрпақтар сабақтастығын нығайту мақсатында құрылған Тәлімгерлер кеңесінің қызметі таныстырылды.
Кеңес төрағасы, полиция ардагері Ерлан Сансызбаев сөз сөйлеп, тәжірибелі зейнеткерлердің көмегімен жас қызметкерлердің тәрбиесіне бағытталған ұйымның жұмысы туралы баяндады. Мұндай кездесулер ішкі істер органдарының қызметін жетілдірумен қатар, қоғамдағы құқықтық мәдениетті қалыптастыруда маңызды рөл атқарады.
«Жетісу-Ақпарат»
