Жетісу облысының аумағында 2025 жылғы 19 сәуір мен 19 мамыр аралығында жол-көлік оқиғаларының алдын алу, көлік тәртібін арттыру және жол ережесін бұзудың алдын алу мақсатында «Қауіпсіз жол» атты облыстық жедел-профилактикалық іс-шара өткізілуде.
Іс-шара аясында полиция қызметкерлері жол қозғалысы ережелерінің өрескел бұзғандарды анықтау және олардың жолын кесу бойынша бақылау шараларын күшейтеді. Атап айтқанда, осы кезеңде, әсіресе түнгі уақытта, патрульдік полиция нарядтарының саны артады.
Негізгі назар келесі құқық бұзушылықтарды анықтауға бағытталады:
-
көлік құралын мас күйде басқару;
-
қарсы бағыттағы қозғалысқа шығу және басып озу ережелерін бұзу;
-
жол қиылыстарынан және жаяу жүргіншілер өткелдерінен өту ережелерін сақтамау;
-
маневр жасау кезінде ережелерді бұзу;
-
қауіпсіздік белдігін тақпау;
-
жүргізу кезінде ұялы телефон қолдану.
Полиция қызметкерлері барлық жол қозғалысына қатысушыларды жол ережелерін қатаң сақтауға, сақтық танытуға және өз қауіпсіздігіне жауапкершілікпен қарауға шақырады. Жолдағы тәртіп пен қауіпсіздік – қоғамның ортақ игілігі.
«Жетісу-Ақпарат»
Фото: egemen.kz
