Талдықорғандағы №27 орта мектеп-гимназиясы 9-сыныптың 30 оқушысы, оның ішінде мектепішілік есепте тұрған жасөспірімдер, облыстық полиция департаменті музейіне танымдық экскурсия жасап, құқық қорғау қызметінің қыр-сырын жақыннан танып қайтты.
Экскурсияның басты мақсаты – жасөспірімдердің құқықтық сауаттылығын арттыру, олардың қоғамдағы тәртіп пен заңның маңызын терең түсінуіне жағдай жасау еді. Өскелең ұрпақты құқық бұзушылықтың алдын алуға бағыттап, тәртіпке бейімдеу мектеп пен полицияның ортақ міндеттерінің бірі. Осыған орай ұйымдастырылған бұл сапар балаларға тек жаңа ақпарат беріп қана қоймай, олардың көзқарасын кеңейтті, ойына ой қосты десек қателеспейміз.
Музей қызметкерлері оқушыларды ішкі істер органдарының тарихымен таныстырып, полиция қызметінің ғасырдан астам уақытқа созылған даму кезеңдерін қызықты деректермен ұштастыра баяндады. Мұражайда сақталған арнайы құралдар, тарихи құжаттар мен қызметтік жабдықтар жасөспірімдердің ерекше назарын аударды. Әсіресе, өткен кезеңдерде қолданылған киім үлгілері мен қызметтік техника балалар үшін тың жаңалық болды.
Оқушылар полиция қызметінің қоғам тыныштығын қамтамасыз етудегі маңызды рөлін сезініп, құқық қорғау саласының қиындықтары мен жауапкершілігін тереңірек түсінді. Тәртіп сақшыларының өмірі тек қызмет емес, ел алдындағы міндет пен адалдықтың символы екенін ұғынған шәкірттер үлкен қызығушылық танытып, көптеген сұрақ қойды. Музей мамандары әр оқушының сауалына түсінікті, мәнді жауап беріп, олардың құқық туралы танымын толықтыра түсті.
Бұл экскурсия, әсіресе, мектеп-ішілік есепте тұрған оқушылар үшін зор тәрбиелік маңызға ие. Құқықтық мәдениетті қалыптастыруға бағытталған мұндай шаралар жасөспірімдердің әлеуметтік ортаға бейімделуін жеңілдетіп, жауапкершілік сезімін нығайтуға ықпал етеді.
Сапар соңында оқушылар экскурсиядан алған әсерлерімен бөлісіп, полиция қызметінің оңай еместігін, әр маманның еңбегінің қоғамға пайда әкелетінін атап өтті. Мұндай танымдық шаралар жас буынның құқықтық санасын көтеріп қана қоймай, олардың болашаққа деген көзқарасын қалыптастырып, дұрыс бағыт таңдауға жетелейді.
Тәртіп пен заңдылықты сақтау әр азаматтың міндеті. Ал оны бүгіннен түсінген жасөспірім ертең қоғамның жауапты мүшесіне айналары сөзсіз.
Бахтияр ЖАҚСЫГЕЛДИНОВ,
әдеп-құқық жұмысы жөніндегі ментор
