«Жас сарбаз» балалар студиясының тәрбиеленушісі Жасмина Түзелова ресейлік «Голос. Дети» байқауының 12-маусымының финалына өтті, деп хабарлайды 7-su.kz ақпарттық порталы.
12 жастағы алматылық талант иесі өз дарыны, табандылығы және сахнаға деген сүйіспеншілігінің арқасында қазылардың да, көрермендердің де жүрегін жаулап алды. Алғашқы әнін орындаған сәтте-ақ үш бірдей тәлімгердің назарын өзіне аудартқан жас орындаушы енді финалда Қазақстанның атын асқақтатады.
– Қазақстанды үлкен сахнада таныстыру – мен үшін зор мәртебе. Әр әнімді жүрегіммен орындаймын, адамдар менің Отанға деген сүйіспеншілігімді сезінсе деймін, – дейді Жасмина.
Ол Ауған соғысының ардагері Мұратбек Өтеевтің отбасында дүниеге келген. Вокалмен бес жасынан айналысып, сегіз жасында ұлттық «Бала дауысы» байқауында бас жүлдені иеленген. 2023 жылы халықаралық «Балалардың Жаңа толқыны» фестивалінде финалға өтіп, ерекше өнер көрсетті.
2025 жылы Жасмина Ресейде өткен «Спасск мұнарасы» XVII Халықаралық әскери-музыкалық фестивалінде Орталық әскери оркестрмен бірге Ұлы Жеңістің 80 жылдығына арналған шарада «Әлия» әнін орындап, көрермендерді тәнті етті.
Анасы Гүлзия Өтеева қызының жетістіктеріне шексіз қуанышты екенін айтып:
– Жасмина кішкентайынан өнерге құштар. Оның әрбір жеңісі – еңбектің нәтижесі. Қызымыз өз табыстарымен басқа балаларға шабыт беріп жүр, – деді.
Өткен жексенбіде елорда әуежайында жас әншіні Мәскеуге шығарып салу рәсімі өтті. Оған «Жас сарбаз» жасөспірімдер қозғалысының өкілдері, ҚР Қарулы Күштері Ұлттық әскери-патриоттық орталығының музыканттары және туған-туыстары қатысты.
Жасмина Түзелова енді Мәскеудегі финалда өз өнерін паш етіп, ел намысын қорғауға дайындалуда.
