Ел егемендігін еншілеген тұстан бері мемлекет құрылысында көптеген айтулы жетістіктердің мінберінен көріндік. Көрегендік пен кемел шешімдердің арқасында мүмкіндіктер көкжиегін кеңейтіп, бүгінде әлем таныған Қазақстанды мыңжылдықтардан «Мәңгілік Ел» болу мұратына қарай жетелеп келеміз. Бұл жолда тірсектен қағып, аяқтан шалатын сыбайлас жемқорлық сынды заман дертінің алдын алу және болдырмау өзекті мәселе болып отырғаны жасырын емес.
Тәуелсіздіктің Көк туын көтерген 30 жылдан астам тарихымызда парақорлық әрекеттеріне қарсы түрлі реформалар қабылданып, тиісті заңдар да жүзеге асты. Бүгінде қажетті шаралар шеңберінде жүйелі жұмыстар атқарылып, халықтың жемқорлыққа қарсы теріс пікірін қалыптастыру мақсатында орасан істер қолға алынуда.
Жемқорлық – жекелей адамдарға ғана емес, күллі дүниежүзі халқына орасан зор зардап әкеліп отырған індет. Мұндай бармақ басты, көз қысты әрекеттердің қай заманда, қай елден тамыр тартқаны белгісіз, алайда қазір әлемді түгелдей жаулап отырғаны ащы шындық. Оны түбегейлі жою мүмкін емес болғанымен алдын алу және жемқорлық көріністерін азайту – мемлекеттік саясаттың басты міндеттерінің қатарында. Бүгінде ел аумағында сыбайлас жемқорлыққа қарсы шаралар қабылдау, күрес жұмыстарын күшейту күн тәртібіндегі алғашқы тақырып болып отыр. Себебі, әлеумет мүддесін көздеген әр салаға жыл сайын миллиардтап қаржы бөлінеді де, жеме-жемге келгенде кей бөлігінің қайда кеткені белгісіз болып қалады. Бұл, ең алдымен, мемлекеттік тұтастық пен қауіпсіздікке төнген қатер және балалардың болашағын ұрлау деп білеміз.
«Саусақ бірікпей ине ілікпейді» демекші, экономика тамырына уытын жайған жемқорлықпен күресті қоғам болып қолға алған жөн. Сонда ғана ғасыр дерті атанған кесапаттың кесіріне қарсы тұра аламыз.
Бізге көбіне айналаға айтатын ақылды айнаға қарап тұрып айтуды үйренген жөн. Себебі өзгенің сүрінгенін байқау оңай, өз жығылғанымызды мойындау қиынның-қиыны. Ұлттық санамызға, болмысымызға, дінімізге, ділімізге де жат дүниеге қарсы тұруды әр азамат өзінен бастағаны абзал. Сіз түзелмей қоғам да түзелмейтінін ұмытпаңыз.
Жемқорлық – мемлекеттің жаһандық бәсекелестікте ауқымды қадамдар жасауға кедергі болып, елдің беделі мен қауіпсіздігіне көлеңке түсіретін құбылыс. Ең айта кететіні, бұл індет билік пен бұқара арасына іріткі салып, елдің заң мен әділеттілікке деген сенімін сетінететіні жасырын емес. Мұндағы басты мәселе – қоғамдық бірлік, өзара келісім мен татулық деп білемін. «Көп тебінсе жер де сілкінеді» демекші, бір жеңнен қол шығарып, келешек үшін кемел бастамаларды жұмыла көтерсек – жемқорлықты тамырымен жоюға мүмкіндік туар еді. Ортақ мәселе болған бұл тақырыпқа келгенде көп азаматтар енжарлық танытып, өз бастарына келмейтіндей үстірт қарайды. Алайда ертең басыңа бұлт үйірілгенінде сан соғып, бармақ тістеп қаларың анық. Сондықтан да бүгіннен бастап әрекет ету – болашақтың бұлыңғыр болмауының бір кепілі.
Сыбайлас жемқорлықпен күрес – қазіргі замандағы әр мелекеттің де, әр азаматтың да басты мақсатының біріне айналғаны жөн. Себебі, осынау жең ұшынан жалғасқан әрекеттер барлық елдің қауіпсіздігі мен бүтіндігіне қауіп төндіріп, даму үрдісін тежеп отырғаны жасырын емес. Осы ретте біздің де басты басымдықтарымыздың бірі жемқорлықтың жолын кесу сынды тақырыппен тамырлас болу.
Асылым АСХАТБЕК,
Жетісу облысының жер ресурстарын басқару департаментінің бас маманы
Сурет: интернеттен алынды
