Жетісу облысының Ескелді ауданында мәдениет үйінде өскелең ұрпақ арасында құқықтық мәдениетті қалыптастыруға арналған мазмұнды да әсерлі іс-шара ұйымдастырылды. Іс-шараның бұл жерде өтуі тегін емес – мәдениет заңға деген құрметтен, тәртіп пен әділдіктің бейбіт қоғамның негізі екенін түсінуден басталады, деп хабарлайды 7-su.kz ақпарттық порталы Polisia.kz сайтына сілтеме жасап.
«Заң мен тәртіп» идеясын жүзеге асыру аясындағы бұл форумға полиция, прокуратура, білім бөлімі, сондай-ақ өңірдің білім беру және тәрбие басқармасының өкілдері қатысты. Шамамен 100 оқушы, 200 ата-ана және 24 тәрбие ісі жөніндегі орынбасар жиналды. Кең көлемді қатысу құқықтық сана мен жауапкершілік сезімін ерте жастан қалыптастырудың маңыздылығын айқындайды.
Іс-шара барысында құқықтық тәрбиенің практикалық жағына ерекше мән берілді. Оқушылар заңның қалай жұмыс істейтінін және оны бұзудың салдарын сахналық көріністер арқылы көрсетті. Қойылымдарда балалар әрбір әрекеттің өз салдары бар екенін, ал заңға құрметтің тәртіп, адалдық және жауапкершіліктен басталатынын жеткізді.
Сонымен қатар, оқушылардың орындауындағы шығармашылық нөмірлер көрермендердің жүрегіне жол тауып, құқықтық тәртіп пен адамгершілік қағидаттарының маңыздылығын түсіндіре білді.
Жетісу облысы полиция департаментінің қоғамдық қауіпсіздік басқармасы бастығының орынбасары сөз сөйлеп, мұндай кездесулер мектеп, ата-ана және құқық қорғау органдары арасындағы сенімді нығайтатынын атап өтті. Оның айтуынша, азаматтық жауапкершілікке тәрбиелеу отбасынан және білім беру ортасынан бастау алады.
