Бүгін Жетісу облысының Полиция департаментінде Қазақстан Республикасы Ішкі істер органдары ардагерлерінің күніне арналған салтанатты іс-шара өтті. Аталмыш дата қоғам тыныштығын қорғап, офицерлік борышын адал атқарған жандарға құрмет көрсетілетін ерекше күн.
Мерекелік шара Ішкі істер органдары қызметінде жүріп қаза тапқан қызметкерлердің ескерткішіне гүл шоғын қою рәсімінен басталды. Қатысушылар олардың рухына тағзым етіп, бір минут үнсіздік жариялады.
Одан кейін департамент ғимаратында салтанатты концерт ұйымдастырылып, полиция оркестрі патриоттық әндер орындады. Шараның басты мақсаты – ардагерлердің еңбегіне алғыс білдіру және жас қызметкерлерге үлгі ету.
Жиын барысында 24 ардагерге Жетісу облысы Полиция департаменті бастығының атынан Алғыс хаттар табысталды, ал 48 ардагер Ішкі істер органдары ардагерлер кеңесінің марапаттарына ие болды.
Ардагерлер – полиция қызметінің тірі шежіресі, олардың ерлігі мен адалдығы жас ұрпақ үшін өнеге. Сол себепті бұл күн ел қауіпсіздігіне үлес қосқан азаматтардың еңбегін бағалаудың айқын көрінісі болды.
