Жоғары Сот Кеңесінде Кеңес мүшелерінің кезекті жұмыс отырысы өтті, – деп хабарлайды 7-su.kz ақпараттық порталы ведомствоның баспасөз қызметіне сілтеме жасап.
Жиын барысында Кеңес Төрағасы айқындаған басым міндеттер мен алдағы қызметтің негізгі бағыттары егжей-тегжейлі қаралды. Жоғары Сот Кеңесі судьялар корпусын қалыптастырудағы ашықтық пен кәсібилікті басты орынға қойып отыр. Отырыстың негізгі өзегі – судьяларды іріктеудегі конкурстық рәсімдерді жетілдіру мәселесі болды. Мүшелер іріктеудің бағалау және цифрлық кезеңдерінің жекелеген аспектілерін талқылап, заманауи технологияларды енгізу арқылы адами факторды азайту жолдарын қарастырды. Сонымен қатар, қолданыстағы регламенттік құжаттарға талдау жүргізіліп, оларды практикалық қолдану тұрғысынан өзектендіру қажеттігі айтылды.
Жоғары Сот Кеңесі жүйелі түрде келесі бағыттар бойынша жұмыс істеуді жалғастыруда: әрбір конкурс кезеңінің мөлдірлігін қамтамасыз ету, іріктеу процесіне IT-шешімдерді енгізу арқылы объективтілікті арттыру және судьялыққа үміткерлердің тек заңгерлік білімін ғана емес, сонымен қатар кәсіби деңгейін де бағалау. Бұл шаралардың барлығы еліміздегі сот жүйесіне деген халықтың сенімін арттыруға және әділетті төрелік ететін білікті мамандарды іріктеуге бағытталған. Кеңес мүшелері регламенттік құжаттардың жаңа талаптарға сай болуы – сот реформасының сәтті жүзеге асуының кепілі екенін атап өтті. Жоғары Сот Кеңесі судьяларды іріктеу тетіктерін жетілдіру бойынша жүйелі жұмысты дәйекті түрде жалғастыруда, бұл кәсіби судьялар корпусын қалыптастырудың негізгі бағдары болып қала бермек.
