Бұрындары «Шетелде қоқыстан да қажетті дүниелер жасалыпты» дегенді жиі еститінбіз. Мұндай жұмыс қазір біздің елде де жүзеге асырыла бастады. Іле ауданындағы «Компания В» жауапкершілігі шектеулі серіктестігі дәл осындай істерді қолға алып, қағаз қалдықтарын өңдеумен айналысуда.
Істің қыр-сырымен жақын танысып, жұмыс үрдісін көру үшін зауытқа арнайы бардық. Атшаптырым аумақта орналасқан кәсіпорында тынымсыз тірлік жүріп жатты. Ішіне енген мезетте-ақ тау-тау болып үйілген қағаз қалдықтарына назар аудардық. Қоқыстар көз алдымызда қайта өңдеуден өткізіліп, әп-сәтте дайын өнімге айналды. Сол заттардан картон, қорап сияқты бұйымдар жасалуда. Өндіріс орнының басшысы Вадим Долгополовтың айтуынша, негізінен олар арнайы тапсырыс бойынша жұмыс істейтін көрінеді. Бастапқы жылдары істі аяқтан тұрғызу оңай болмапты. Соған мойымастан тек алға жылжып, жұмысты жандандыруда талмай еңбек еткен. Мемлекет тарапынан жасалған көмектердің де оң әсері тиіпті.
Былтыр «Бизнестің жол картасы – 2020» мемлекеттік бағдарламасы аясында 6 пайызбен 33 миллион теңгеден астам несие алып, жаңа қондырғылар сатып алынған. Қазіргі кезде қағаз шығару үрдісі сол құрылғылардың күшімен автоматты түрде жүзеге асырылуда. Ал оның тетіктерін арнайы жұмысшылар басқарады. Мұнда жүзден аса адам еңбекпен қамтылған. Басым бөлігі жастар және сол өңірдің тұрғындары. Оларға орта есеппен жүз мың теңгеден асатын жалақы төленеді. Айта кетейік, зауытта тәулігіне 20 тонна, айына 750 тоннадан астам қағаз өңделеді. Қалдық негізінен Алматы қаласы және облыс аумағынан жинап әкелінеді. Шілде айында Қырғыз еліне 200 тонна өңделген қағаз экспортталған.
Айта кетейік, кәсіпорынның жұмыс істеп келе жатқанына он бес жылға жуықтапты. Содан бері талай істің басын қайырып үлгерген өндіріс ұжымының бүгінгі тірліктері жаман емес. Оған қоршаған ортаны ластанудан сақтап, экологиялық жағдайды жақсартуға үлес қосып отырғандары дәлел. Кейбір мәліметтерге сүйенсек, егер бір тонна қағаз қайта өңдеуден өтсе, он алты ағаш сақталатын көрінеді. Сондай-ақ, бұл жұмыс ағаш өңдеуге қарағанда қуат жағынан үнемді әрі экологиялық тұрғыдан тиімді өндіріс болып табылады. Сондықтан, аталмыш кәсіпорынның атқарып жатқан жұмыстары үлгі тұтарлық деуге болады.
Айгүл Байбосынова
Іле ауданы.
