Иә, Есенқұл Жақыпбековті қазақ поэзиясындағы құбылыс десек, қателесе қоймаймыз. Себебі, болмысы бөлек ақын қазақтың қасиетті де киелі сөз өнерін, соның ішінде екінің біріне қона бермейтін суырыпсалма ақындық пен жазба поэзияны қатар меңгеріп, өз есімін жүректерге жазып қалдырды. Жырдан жақұт терген Есенқұлдың айтыста шақпа, жазба поэзияда ақпа ақын атанғанын көзіміз көрді. Сондықтан болар, өзі арамызда жоқ болса да атын ардақтаған ағайын жыл сайын Есенқұлға арналған мәдени шаралар өткізіп келеді.
Жуырда ғана Жамбыл ауданы ақынның туған күнін кең көлемде атап өтсе, қарасайлық қауым «Ел еркесі – Есенқұл» атты ақынның өлеңдеріне жазылған әндер байқауын қорытындылады. Аудан әкімі Махаббат Бигелдиевтің бастамасымен және қолдауымен өткен өнер додасы апта соңында аудандық Мәдениет үйінде өз мәресіне жеткен.
Ақынын ардақтаған ағайын алдымен Есенқұлдың поэзиясына арналған сахналық қойылымды тамашалап, өлең өлкесіне саяхат жасап қайтқан. Халқымыздың ежелгі дәстүрі бойынша жырдан шашу шашылғаннан кейін ән байқауына қазылық жасаған азаматтар сахна төріне көтерілді. Алғашқы болып сөз алған ақын, композитор әрі продюсер Бауыржан Есебаев жеңімпаздарды құттықтап, «Жаңа ән номинациясы бойынша Есенқұл Жақыпбековтың өлеңдеріне жазылған республикалық әншілер байқауында жоғары орындаушылық шеберлік көрсеткені үшін Дәурен Алғысбекке, Есбол Шаңбайға, Мәди Жылқышыбаевқа, Амантай Еркебұланға, Алтынгүл Бахытқанға арнайы дипломдармен қоса 70 мың теңге сыйлықты табыс етті. Ал, байқау қорытындысы бойынша үшінші орынды жеңіп алған Мейіржан Самылтыровқа, Жаңыл Мерсимоваға, Жасұлан Мұсағалиға дипломдар мен 100 мың теңге сыйлықты Қазақстан Республикасы Мәдениет саласының үздігі, танымал әнші Саят Медеуов өз қолымен ұсынған. Қазақстан Жазушылар одағы басқармасы төрағасының орынбасары Жанарбек Әшімжан мен ҚР Мәдениет саласының үздігі, композитор, «Үшқоңыр» фольклорлық-эстрадалық ансамблінің көркемдік жетекшісі Бағлан Омаров байқаудың екінші дәрежесінен көрінген Әліби Қаниевты, Әділет Әдікеновты дипломмен және 150 мың теңге ақшалай сыйлықпен марапаттады. Әділқазылар алқасының төрағасы, «Қазақ әдебиеті» газетінің бас редакторы Жұмабай Шаштайұлы болса бірінші орыннан көрінген Мұқатай Баймұханбетке арнайы диплом мен 200 мың теңге сыйлықты табыс етті.
Осыдан кейін сахна төріне көтерілген «Ел еркесі – Есенқұл» атты республикалық әншілер байқауы жобасының авторы әрі демеушісі, аудан әкімі Махаббат Сәдуақасұлы жұртшылық жүрегіне мәңгілік қонақтаған Есенқұл поэзиясының құдіреті турасында өз ойларын ортаға салып, еліміздің әр шалғайынан аталған байқауға қатысқан 60-қа жуық өнерпаздарға алғысын жеткізді. Осыдан кейін өнер меценаты дәстүр бойынша кештің кейіпкері Есенқұл Жақыпбековтың жары Меңсұлудың иығына шапан жауып, әншілер байқауының бас жүлдесін жеңіп алған Дінисламбек Жайлаубаевқа арнайы диплом мен 300 мың теңге сыйлықты табыс етті.
Суырыпсалма ақындықтың үлгісімен күрделі ұйқастарға бармай, барынша қарапайым жырлар жазған Есенқұл жүректен шығатын жылы өлеңдерімен өз оқырмандарын баурап алған еді. Ал оның өлеңдеріне жазылған әндер миллиондардың қалаулы әуеніне айналғалы қашан! Бұл жолы да өнер додасын тамашалауға жиналған жұртшылық Есенқұлдың сөзіне жазылған әндерді тыңдауға ерекше құлшыныс танытты. Соңына қарай Махаббат Бигелдиевтің сөзіне жазылған Бауыржан Есебаевтың «Аққумен сырласқан Есағам!» атты әні ақынға деген шынайы құрметімен, сезім қылын шертер нәзіктігімен жұртшылық көңілін баурап алды. Махаббат Сәдуақасұлы бұл өнер додасын дәстүрлі түрде өткізіп отыру жоспарда бар екенін айта келіп, байқауға қатысқан өнерпаздар мен шараға жиналған жұртшылыққа табыс тіледі.
Қарасай ауданы.
