Жетісу облысында «жұмысшы мамандықтары жылы» аясында «Еңбекпен ер атанған» көш керуені мәдени шаралары басталған болатын. Бүгінге дейін Ескелді, Көксу, Ақсу аудандары және Текелі қаласын аралап өткен көш керуен Сарқан ауданында болып, көпшілікке мерекелік көңіл-күй сыйлады.
Құман Тастанбеков атындағы аудандық Мәдениет үйінің кіреберісінде шара шеңберінде еңбектің құндылығын ұғындыратын кітаптар мен суреттер көрмесі ұйымдастырылды. Сондай-ақ, саялы өңірден шыққан еңбек ерлерінің шығармашылық заттары, күнделікті қолданған бұйымдарын өңіріміздегі музейлер көрермендеріне ұсынды.
Сол сияқты шара аясында ауылшаруашылығы, егін шаруашылығы, қызылша, жүгері, картоп, жеміс-жидектерді өсіру технологиясы, оны дамыту жолдары мен тиімділігі туралы кітаптармен қатар Сарқан политехникалық колледжінде ашылып жатқан жаңа мамандықтар туралы мағлұмат берілді.
Іс-шаралар легі Д. Рақышев атындағы облыстық филармонияның концерттік бағдарламасымен түйінделді. Кеш соңында аудан әкімінің орынбасары Алмас Байғонысов «жұмысшы мамандықтар жылының» маңызы зор екендігін айта келе сарқандықтарға мерекелік көңіл-күй сыйлаған ұйымдастырушыларға алғысын білдірді.
Сарқандық ақсақалдар, ұстаздар, мектеп оқушылары, жалпы аудан тұрғындары тамашалаған көш керуені мәдени жобасы әрмен қарай Алакөл ауданына жол тартты.
Жақсылық ИГІМАН
Сарқан ауданы
